ཁྱེད་དང་ང་ཡི་རྨི་ལམ་ལ་གཤོག་པ་ཐོགས་ས། ཛམ་བྷ་ལའི་ཞིང་ཁམས།

རྨི་ལམ་གྱི་ས་བོན། 

འདི་ནས་འབུས་ཤིང་མེ་ཏོག་བཞད་། 

         ངོ་མཚར་ཆེ་བའི་གནའ་བོའི་ས་གཞི་འདི་ནི་འཛམ་ཐང་མི་དམངས་ཀྱི་སེམས་ཁོང་དུ་གནས་པའི་རྟག་བརྟན་གྱི་གནས་མཆོག་ཡིན་ལ། ལོ་ངོ་སྟོང་ཕྲག་རིང་ཁོ་ཚོ་འདི་གར་འཚོ་སྡོད་བྱེད་ཀྱིན་ཡོད།

   ཁོ་ཚོས་གནས་འདིར་དཔྱིད་རྨོད་སྟོན་བསྡུ་བྱེད་ཅིང་། ཚེ་ཚེ་རབས་རབས་སུ་ཡུལ་འདི་སྲུང་ཞོར་རང་ཉིད་ཀྱི་རྣམ་དག་གི་བརྩེ་བ་བསྟིམས་ཡོད།

     འཛམ་ཐང་།

     སུ་ཞིག་འཛམ་ཐང་དུ་སླེབས་དུས། འཛམ་ཐང་བའི་ས་ཆེན་དང་རང་བྱུང་ཁམས་ལ་བཅངས་པའི་བརྩེ་བ་དྲོན་མོས། རྩྭ་རྩེའི་བསིལ་བ་ཡང་བརྩེ་བའི་ནེམ་གྱིས་ཉི་འོད་ཀློང་དུ་ཁྲ་ཀྱིག་གེར་གནས་ཡོད་པས། སྐབས་འདིར་ཁྱེད་ཀྱིས་མཐོང་བ་ནི་མཛེས་སྡུག་དང་རང་བྱུང་མཉམ་གནས་ཀྱི་འཛམ་ཐང་བའི་སེམས་པ་ཡིན་ལ། ཞིབ་ཏུ་བལྟས་ན་དེའི་ཕག་ཏུ་ཡིབས་པའི་བླ་ན་མཐོ་བའི་རིག་གནས་ཀྱི་དཔའ་གདེངས་ཀྱང་ཉམས་སུ་མྱོང་ཐུབ། 

དཔྱིད་རླུང་འཛམ་ཐང་ལ་རྒྱུ་ན།

ཁྱེད་རང་རྫི་བོའི་གླིང་བུར་སྤྲུལ་ནས་སྐྱེ་དངོས་ཀྱི་འཚར་སྟོབས་དབྱངས་ལ་བརྒྱུས་ཆོག

སྦྲང་ཆར་འཛམ་ཐང་ལ་བབས་ན།

ཁྱོད་རང་ཆུ་ཕྲན་དུ་བརྫུས་ནས་དྭངས་གསལ་གསལ་གྱི་སེམས་པ་མོ་ལ་བསྟན་ཆོག

འཛམ་ཐང་།

རྫ་སུལ་གྱི་དིང་གླིང་ཁེར་འབུད་དེ་ཁྱེད་ཡིན་ནམ།

རི་གཤམ་གྱི་རྫི་གླུ་ཁེར་ལེན་དེ་ཁྱེད་ཡིན་ནམ།

དུས་ཚིགས་ཀྱི་འཁོར་འགྲོས་རེ་རེ་ལས།

ཁྱེད་ཀྱི་པང་དུ།

བཤད་མི་ཚར་བའི་སྲིད་པའི་གཏམ་རྒྱུད་མང་པོ་ལྷོད་ཀྱིས་འབབ་དུས།

ཐ་ན་རི་གྲོང་གི་དུ་ཞགས་ཕྲ་མོ་ཡང་།

རྒྱལ་ཁམས་པའི་སེམས་ཀྱི་གཟུང་འཛིན་མ་ཡིན་ནམ།

འཛམ་ཐང་ནི་རང་བྱུང་ཁམས་ཀྱི་ཆ་ཤས་ཤིག་ཡིན་པ་ལས། རང་བྱུང་ཁམས་ཡོད་ཚད་འཛམ་ཐང་མིན།

གལ་ཏེ། རང་བྱུང་ཁམས་ཡོད་ཚད་འཛམ་ཐང་ལྟ་བུར་ཡིད་འོང་གིས་གནས་ཚེ།

སུ་ཞིག་གིས་འཛམ་ཐང་བློས་གཏོང་མི་ཐུབ་བམ།

འབྲི་མོའི་ངུར་སྒྲ་ལྷས་ར་ལ་འཁྱིལ་དུས།

བུ་མོའི་བཞོ་དབྱངས་མཁའ་མཐའ་ལ་འཐེན་དུས།

སྤྲིན་པས་རྒྱང་འགྲུལ་གྱི་གོམ་མཚམས་བཞག་ནས།

ཁྱེད་དང་ང་ཡི།

ད་དུང་། གཞོན་ནུ་མའི་སེམས་པ་ཁྱེར་ཏེ།

ས་མཐའི་རྫི་བོ་ཁེར་རྐྱང་གི་ཕྱོགས་སུ་ཡང་བསྐྱར་ལམ་དུ་ཆས་དུས།

དངོས་ཡོད་ལས་བརྒལ་བའི་སྣང་བརྙན་ཞིག་གིས།

མ་གཞི་འཇིག་རྟེན་ནི་ཅི་འདྲའི་དྲོད་ཁོལ་ལྡན་པ་ཞིག་ཡིན་པ་ཤེས་ཐུབ། 

འཛམ་ཐང་།

ཁྱེད་ཀྱི་པང་དུ་ཡོད་ཚད་ལ་རྣམ་ཤེས་ཡོད་ལ།

བརྩེ་བའི་དྲོད་ཁོལ་གྱིས་གཏམས་ཡོད།

རྩོམ་སྒྲིག་པ། ཚེ་པེ།