བྱིས་པ་ཞིག་གི་འཇིག་རྟེན།

རྩོམ་པ་པོ།   གསེར་དུང་སྙུག དུས་ཚོད།   2021-01-28   རྩོམ་ཁུངས།    རྔ་བའི་གསར་འགྱུར་དྲ་བ།

ཁྱོད་ཀྱི་བློ་མིག་དེར།

རྒྱང་རིང་དང་རྩྭ་ཐང་གི་རྣམ་ཤེས་འཁྱིལ་ཡོད།

རི་བོ་རྫོགས་མེད་ཅིག་དང་།

ནགས་ཚལ་གྲངས་མེད་ཅིག

བཞིན་གྱི་རི་མོར་གསལ་འདུག

ས་ཆ་དེ་བདག་གི་ཕ་ཡུལ་ཡིན་ཡང་སྲིད།

མཁུར་ཚོས་དམར་བོ།

མིག་ཟུང་རིག་རིག

ལོ་ངོ་བཅུ་ཕྲག་གི་ཁྱོད་ཀྱི་དྲན་པ།

རྣམ་ཤེས་གསར་བ་ཞིག་གི་སྐྱེ་བ་ཡིན།

སྐབས་དེར་ཁྱོད་དང་ལང་ཚོའི་དབར།

གཞས་མ་གཏམ་གྱི་སྐྱོ་གར་ཡོད།

ངུ་མ་དགོད་ཀྱི་འཚོ་བ་ཡོད།

ཁྱོད་ཀྱི་ལྟེ་ཐག་དམར་བོ་དང་སྐྲ་ལོ་ཟེད་པོ།

དམ་བཅའ་དང་ཚེ་སྲོག་གི་མནའ་གདན་ཡིན།

ཁྱོད་ནི་ཤོག་བུས་ཀྱང་དྭངས་ཤིག་ཡིན།

ཉི་མ་བས་ཀྱང་དྲོ་ཞིག་ཡིན།

དེ་ནི་ཁྱོད་ལ་བརྩེ་དུང་གི་རུམ་ཁ་དྲོན་མོ་དང་།

མི་ཞིག་གི་ལམ་ལུགས་ཚང་བས་ཡིན།

རྩོམ་སྒྲིག་པ། ཚེ་པེ།  གཡུ་འཛོམས།