ལམ་གྱི་ལེའུ།

འཚོ་བའི་དམ་ཚིག་གི་རྨི་ལམ་སྨུག་པོ།།

ས་ཡི་དཀྱིལ་སྙིང་གི་ལྟེ་བར་བཞད་དེ།།

དགའ་སྡུག་རེས་མོས་ཀྱི་གྲུ་ཟུར་བར་ནས།།

མི་ཚེའི་འགྲུལ་བཞུད་ཀྱི་སྐྱ་ཐིག་བྲིས་སོང་།།

ལོ་ཟླའི་འཁོར་སྐྱོད་ཀྱི་རྨུ་ཐག་རིང་མོར།།

གཞིས་ཁྱིམ་ཞེ་ཐོགས་ཤིག་སེམས་པར་ལྷུང་བས།།

དབྱངས་གསལ་སོ་བཞི་དེ་ངག་ལ་བརྒྱུས་པས།།

གཡང་གི་རུ་མ་ཞིག་འཚོ་བར་འཁོར་ཡོད།།

ནས་སྙེ་མའི་མགོ་ལྕོག་ལྡེམ་སེ་ལྡེམ།།

རོང་བུ་མོའི་འཛུམ་དཀར་ཤིགས་སེ་ཤིག།

འབྲོག་རོང་བའི་འཚོ་བ་ཁ་སྤྲོད་དེ།།

ཕྱིར་དྲན་པའི་སེམས་སུ་ལྷོག་གེར་འཕྱོ།།

གཞོན་པའི་ལང་ཚོར་རེ་བའི་དབུ་ཁྱུད་བྲིས།།

རིགས་ཀྱི་ཞེན་པ་ཕུགས་ཀྱི་འདུན་མར་བཏབ།།

སྲོག་གི་དབྱངས་རྟ་མི་ཚེའི་གཏན་དུ་སྒོམ།།

ལོ་དང་ཟླ་བ་སྙིང་གི་དཀྱིལ་དུ་བསུས།།

གངས་ཀྱི་རི་ལ་དུངས་བའི་བསམ་པ་དེ།།

ལོ་ཟླས་དེད་པས་ཁ་དོག་འགྱུར་ན་ཡང་།།

གཏན་དུ་རློམ་པའི་སྙིང་གི་བྱམས་པ་དེ།།

རུས་ཀྱི་རྐང་ལ་བཏབ་པའི་རྡོ་རིང་ཡིན།།

ལས་ཀྱི་སྐུད་ལ་བརྒྱུས་པའི་ཉིན་ཞག་དེ།།

སེམས་ཀྱི་ཕྲ་ལ་བཏབ་པའི་ཟློས་གར་ཡིན།།

འཚོ་བའི་གཏམ་རྒྱུད་མངར་ཁ་སྐྱུར་གསུམ་དེ།།

མི་ཚེའི་ལམ་བུར་དྲངས་བའི་སྐྱེམས་ཆང་ཡིན།།

རྩོམ་སྒྲིག་པ། ཚེ་པེ།  གཡུ་འཛོམས།