རྒྱལ་རོང་གི་སྐད་དང་ཆོས་ལུགས་ཡུལ་སྲོལ་སོགས་བོད་སྤྱི་དང་མཐུན་པ།

རྩོམ་པ་པོ།   མཁྱེན་རབ་འོད་གསལ།དུས་ཚོད།   2019-11-04   རྩོམ་ཁུངས།    རྔ་བ་ཁུལ་རྒྱང་སྒྲོག་བརྙན་འཕྲིན་ཁང་།

           བོད་ཡུལ་རྒྱལ་མོ་རོང་གི་ས་ཁུལ་རེ་ཟུང་དང་།  དེ་མིན་ཁམས་ཕྱོགས་ཀྱི་ས་ཁུལ་རེ་ཟུང་ཙམ་གྱིས་བོད་རིགས་ཀྱི་ཡུལ་སྐད་དང་བོད་ཀྱི་སྤྱི་སྐད་ཤོད་མཁན་བར་གོ་བརྡ་མི་འཕྲོད་པ་ཡོད་ཀྱང་ཚིག་སྦྱོར་གྱི་འགྲོས་ནི་གོང་དུ་བཤད་མ་ཐག་པའི་ཁྱད་ཆོས་དང་ཡོངས་སུ་མཐུན་པ་ཡིན་པས་ས་ཁུལ་དེ་ཚོའི་སྐད་ཀྱང་བོད་སྐད་ཀྱི་ནང་གསེས་ཤིག་ཡིན་པར་ཐེ་ཚོམ་མི་དགོས། རྒྱལ་མོ་རོང་གི་མི་ཚོས་ལོ་བརྒྱ་སྟོང་གི་རིང་སྤྱད་པའི་ཡི་གེ་ནི་བོད་ཡིག་ཡིན་པ་ཙམ་མ་ཟད། རྒྱལ་མོ་རོང་གི་མིས་བོད་ཡིག་ཀློག་སྐབས་སྔོན་འཇུག་དང་རྗེས་འཇུག ཡང་འཇུག མགོ་གསུམ། འདོགས་བཞི་སོགས་སྒྲ་དག་པར་ཀློག་པའི་ཚད་དེ་བོད་མི་གཞན་གྱིས་ཡོང་དཀའ་བ་ཞིག་ཡིན་པས། སི་ཏུ་པཎ་ཆེན་གྱིས་ཀྱང་ཡིག་ཀློག་གི་སྒྲ་དག་པའི་ཚད་ལ་འབྲི་གུང་སྐྱོབ་པ་རིན་པོ་ཆེ་བཞུགས་སྐབས་འབྲི་གུང་པ་དང་།  ཡུལ་རྒྱལ་མོ་རོང་པ་བཞག་པ་མ་ཟད། རྒྱལ་མོ་རོང་གི་ཡུལ་སྐད་ཀྱང་ཆེས་སྔ་དུས་ཀྱི་བོད་ཀྱི་བརྡ་རྙིང་ཤིན་ཏུ་མང་པོ་ཡོད་པ་གཟུར་གནས་མཁས་པ་དག་གིས་བརྟགས་ན་རྟོགས་བདེ་བ་ཞིག་ཡིན་པ་དང་ཆོས་ལུགས་ཀྱང་སྲོང་བཙན་གོང་གི་བོན་གྱི་ཆོས་ལུགས་བོན་ཆོས་དར་ཆེ་བ་དང་། བོན་དགོན་ཡང་མང་དུ་ཡོད་པ་དང་། ཁྲི་སྲོང་ལྡེའུ་བཙན་དུས་ལོ་ཙཱ་བ་ཆེན་པོ་བ་གོར་བེེ་རོ་ཙ་ན་རྒྱལ་མོ་ཚ་བ་རོང་དུ་སྤྱུགས་ཏེ་བེེ་རོ་རྒྱལ་རོང་དུ་ཕེབས་དུས་རྒྱལ་རོང་ས་གནས་ཀྱི་རྒྱལ་པོ་མདོ་བཞེར་ནག་པོ་ཡིན་པ་དང་། རྒྱལ་ས་ནི་གཟི་འགག་ཡིན་ཞིང་། ཁོང་རྒྱལ་རོང་དུ་ཕེབས་རྗེས་ཚ་རོང་དུང་རིའི་གནས་སུ་བྱོན་ནས་ཟླ་གསུམ་འཚམས་ལ་བཞུགས་ཞེས་བེེ་རོའི་རྣམ་ཐར་དུ་གསལ།

           ཚ་རོང་དུང་རི་ཞེས་པ་ནི་ད་ལྟ་ཤར་དུང་རི་དཀར་པོ་ཟེར་བ་དེ་ཡིན་། ད་དུང་རྒྱལ་རོང་ཡུལ་དུ། རབ་བྱུང་བཞུགས་ཡུལ་གྱི་དགོན་པ་ཕྱག་བཏབ་ནས་དེ་ལ་ཆ་འཕོ་ནོར་བུའི་གླིང་ཞེས་མཚན་གསོལ། སྔགས་པ་བཞུགས་གནས་ཀྱི་དགོན་པ་བཞེངས་ཏེ་དེ་ལ་ཁྲོ་ཆུ་བདུད་འདུལ་གླིང་ཞེས་མཚན་གསོལ། དུས་ད་ལྟའང་རྒྱལ་མོ་རོང་གི་ས་གནས་ཀུན་ཏུ་བེེ་རོའི་སྒྲུབ་ཕུག་སོགས་མཇལ་དུ་ཡོད། དུས་དེ་ཙམ་ནས་རྒྱལ་མོ་རོང་དུ་ནང་པའི་ཆོས་ལུགས་དང་དགོན་པ་དར་འགོ་ཚུགས། དེ་རྗེས་རིམ་བཞིན་བོད་ཀྱི་གྲུབ་མཐའ་ཁག་གི་ཆོས་ལུགས་དང་དགོན་པ་མང་པོ་བྱུང་ཡོད། ལེགས་པར་བསམ་ན་ཁྲི་སྲོང་ལྡེའུ་བཙན་གྱིས་བེེ་རོ་རྒྱང་ཕུད་གཏོང་ཡུལ་དེ་རང་གི་མངའ་ཁོངས་ཀྱི་མཐའ་འཁོབ་ཅིག་ཏུ་ཡིན་པ་ལས་རྒྱལ་ཁབ་གཞན་ཞིག་གི་ནང་དུ་གཏོང་སྲོལ་མེད་པ་ནི་ང་ཚོའི་རིང་ལའང་རྒྱལ་དབང་སྐུ་ཕྲེང་བཅུ་གསུམ་པ་དགོངས་པ་རྫོགས་རྗེས་སྐབས་དེའི་སྡེ་པ་གཞུང་གིས་སྤྱན་གསལ་ཀུན་འཕེལ་དང་། ལྕང་ཅན་བསོད་ནམས་རྒྱལ་པོ་གཉིས་རྒྱང་འཕུད་གཏོང་ཡུལ་བོད་ཀྱི་ཀོང་པོའི་ཡུལ་ཡིན་ཡང་རྗེས་སུ་ཁོང་གཉིས་ལ་གཞན་གྱིས་རོགས་སྐྱོར་འོག་ལྐོག་ཏུ་རྒྱ་གར་དུ་བྲོས་བྱོལ་དུ་ཕྱིན་པ་རེད།

             རྒྱལ་ཁོངས

            གཞན་ཞིག་ཏུ་ཕྱིན་པ་ལ་བྲོས་བྱོལ་ལམ་སྐྱབས་བཅོལ་ཟེར་བ་དང་། རང་ཁོངས་སུ་ཕུད་པ་ལ་རྒྱང་ཕུད་དང་སྤྱུགས་པ་ཟེར་བ་འདིས་ཀྱང་ལོ་རྒྱུས་ཐོག་རྒྱལ་མོ་རོང་གི་བོད་རིགས་ཀྱི་མཁས་པ་འགའ་དང་། ས་གནས་གཞན་གྱི་མཁས་དབང་འགས་རྒྱལ་མོ་རོང་གི་ལོ་རྒྱུས་དང་སྐད་ཡིག་གི་སྐོར་ལ་གཟུར་གནས་ཀྱི་གསུང་རྩོམ་འགའ་མཐོང་བའི་ནང་དུའང་ཞིབ་ཕྲ་བཀོད་གནང་འདུག

             འདིར་བོད་ཀྱི་སྐད་ཡིག་གི་བྱུང་བ་དང་འབྱུང་འགྱུར་ཤོད་སྐབས་རྒྱལ་མོ་རོང་གི་ལོ་རྒྱུས་དམིགས་བཀར་གྱིས་ཤོད་དགོས་དོན་གང་ཡིན་སྙམ་ན། སྤྱིར་སྐད་ཡིག་དང་ཆོས་ལུགས་གང་འདྲ་ཞིག་ཡིན་རུང་མི་རིགས་ཤིག་དང་མ་འབྲེལ་བའི་སྐད་ཡིག་དང་ཆོས་ལུགས་མེད་པས་དེས་ཀྱང་རྒྱལ་རོང་གི་བོད་རིགས་སྐོར་ཤོད་འོས་པ་དང་། ལྷག་པར་དུ་ལོ་ངོ་བརྒྱ་སྟོང་རིང་ཕྱི་ནང་གང་དུའང་རྒྱལ་མོ་རོང་གི་མི་རྣམས་བོད་རིགས་ཡིན་མིན་སྐོར་ལབ་གླེང་ཙམ་བྱུང་མྱོང་མེད་ཀྱང་། བར་སྐབས་ཤིག་ནས་དགོས་པ་དང་དགོངས་གཞི་ཅི་འདྲ་ཞིག་ཡོད་མེད་མི་ཤེས་ཀྱང་མཁས་མིང་འཛིན་པ་རེ་ཟུང་གིས་རྒྱལ་རོང་བ་རྣམས་ཧ་ལམ་བོད་རིགས་མིན་པར་མི་རིགས་གཞན་པ་ཞིག་ཡིན་ཚུལ་གྱི་གླེང་ཕྱོགས་བྱུང་བ་རེད། གོ་ཐོས་སུ་མཁས་པ་དེ་ཚོས་རྒྱལ་རོང་གི་ཡུལ་སྐད་དང་། བོད་ཀྱི་སྤྱི་སྐད་གཏན་ནས་མི་མཁྱེན་ནའང་རྒྱལ་རོང་གི་ཡུལ་སྐད་དང་། བོད་ཀྱི་སྤྱི་སྐད་གཉིས་མི་འདྲ་བ་ཙམ་གོ་ཐོས་བྱུང་བ་དེ་རང་རྒྱུ་མཚན་དུ་བཀོད་ནས་བཤད་པ་ལས་རྒྱུ་མཚན་གཞན་གང་ཡང་བཤད་རྒྱུ་བྱུང་མི་འདུག

             སྐད་བརྡ་མ་འཕྲོད་པ་ཙམ་གྱིས་མི་རིགས་ཐ་དད་དུ་འཇོག་དགོས་ན་གོང་དུ་བཤད་པ་བཞིན་མི་རིགས་དང་ཡི་གེ་གཅིག་པ་ཡིན་པའི་ནང་དུ་ཕན་ཚུན་སྐད་སྒྱུར་མེད་ཚེ་བརྡ་མི་འཕྲོད་པའི་གནས་ཚུལ་ཡོད་པ་དེ་ཚོ་ཀུན་གཞི་ནས་མི་རིགས་ཐ་དད་དུ་བརྩི་དགོས་པས་ཧ་ཅང་མ་ཐལ་ལམ། བོད་རིགས་ཀྱི་ཆ་རྒྱུས་ཡོད་པའི་མི་སུ་འདྲ་ཞིག་རྒྱལ་མོ་རོང་དུ་སླེབས་ན་དེ་གའི་མི་དམངས་ཚོའི་བཟའ་ཆས་གཙོ་བོ་མར་དང་། རྩམ་པ། ནོར་ལུག་གི་ཤ་དང་། བཏུང་བྱའི་གཙོ་བོ་ནི་ཇ་དང་། ནས་ཆང་སོགས་ཡིན་པ་དང་།  ཞྭ་གོས་ལྷམ་གསུམ་སོགས་གྱོན་ཆའི་རིགས་དང་། གཡུ་བྱི་རུ་སྤོས་ཤེལ་གསེར་དངུལ་སོགས་ཀྱི་ལུས་རྒྱན་དང་། དུས་ཆེན་གྱི་སྐབས་ཕོ་མོ་རྒན་གཞོན་མེད་པར་གཟབ་སྤྲོས་དང་བཅས་མཉམ་དུ་འཛོམས་ཤིང་ཐང་དཀྱིལ་དུ་ནས་ཆང་རྫ་མ་མང་པོའི་ཁར་ཁ་བཏགས་ཀྱིས་དཀྲིས་ཤིང་། ནང་དུ་སོག་མ་ཁ་ཤས་བཅུག་ཅིང་ཆང་མཆོད་ཀྱི་བཤད་པ་མཁས་པའི་མི་ཞིག་གིས་དང་བོ་ཆང་མཆོད་ཀྱི་བཤད་པ་གྲུབ་མཚམས་བོད་རིགས་ཀྱི་ས་ཁུལ་གང་སར་དར་ཁྱབ་ཆེ་ཞིང་གནའ་རབས་བོད་ཀྱི་སྐོར་བྲོ་ཞེས་པ་ཕོ་མོ་མང་པོ་ལག་སྦྲེལ་གྱིས་སྐོར་བྲོ་འཁྲབ་པའི་ཞོར་ལ་ནས་ཆང་སྐོར་འཐུང་བྱེད་བཞིན་རྒྱུན་རིང་བྲོ་འཁྲབ་པ་དང་། དེ་བཞིན་ཆོས་ལུགས་ཀྱི་བྱེད་སྒོ་ནི་བོན་ལུགས་ཀྱི་དགོན་པ་དང་། དེ་མིན་ས་དགེ་རྙིང་གསུམ་དགོན་པ་ཁག་གི་ནང་དུ་ཆོས་ལུགས་ཀྱི་བྱེད་སྒོ་སྣ་ཚོགས་པ་ཡོད་པ་མ་ཟད། མི་སེར་ཀུན་གྱི་ཁྱིམ་དུའང་རྟེན་གསུམ་ཡོད་པ་དང་། དེ་དག་ལ་ཕྱག་སྐོར་བྱེད་པ་མཆོད་མེ་སོགས་འབུལ་བ། མི་ཤི་རྗེས་སུའང་དེའི་ཆེད་དུ་ཆོས་ལུགས་ཀྱི་བྱེད་སྒོ་སྤྱི་དང་། རང་གི་འབྱོར་བར་དཔགས་ཏེ་ཇོ་དར་ཧ་ཅང་མང་བོ་སྤར་ཏེ་རི་ཀླུང་ཀུན་ཏུ་འཛུགས་པ་སོགས་མདོར་ན་ཆོས་འཇིག་རྟེན་གྱི་བྱེད་སྒོ་མཐའ་དག་བོད་རིགས་འཁྲུལ་མེད་ཡིན་པ་ཙམ་མ་ཟད། མིའི་མིང་དང་གོས་རྒྱན་དང་བྱེད་སྒོ་འགའ་ཞིག་ནི་སྔར་སྲོང་བཙན་སྒམ་པོ་གོང་བོད་ལ་བོན་ཆོས་དར་བའི་སྐབས་མ་གཏོགས་ད་ཆ་བོད་རིགས་ཀྱི་ས་གནས་གཞན་དུ་ནུབ་སྟེ་མཐོང་དཀོན་པའི་རིགས་ཀྱང་ཡོད་པ་དང་། ལྷག་པར་དུ་རྒྱལ་མོ་རོང་གི་མི་རྣམས་ཀྱི་པགས་པའི་མདོག་དང་། གདོང་རུས་ཀྱི་དབྱིབས་ཚུན་ཆད་ཀྱི་ཐོག་ནས་བོད་རིགས་འཁྲུལ་མེད་ཡིན་པ་ལ་ཐེ་ཚོམ་ཙམ་མི་དགོས་པ་ཡིན་ཡང་ཞིབ་འཇུག་མཁན་ཁ་ཤས་ཀྱིས་དགོས་པ་དང་དགོངས་གཞི་ཁྱད་པར་བ་རེ་ལ་བརྟེན་ཏེ་ཐབས་ལམ་སྣ་ཚོགས་ཀྱིས་བསྙོན་དུ་མེད་པའི་བོད་རིགས་རྒྱལ་རོང་བ་རྣམས་སྐད་ཀྱི་རྒྱུ་མཚན་ཙམ་ལ་བརྟེན་བོད་རིགས་བྱིངས་ལས་ཁ་བྲལ་བཏང་སྟེ་ཕྱི་ཚུལ་དུ་མི་རིགས་ཆེ་གེ་མོ་ཞིག་གི་མིང་དངོས་སུ་འདོགས་རྩིས་ཡོད་ཀྱང་དེ་ནི་ཕྱི་ཚུལ་ཙམ་དང་གནས་སྐབས་ཙམ་ལས་རྒྱལ་མོ་རོང་གི་མི་དམངས་ཚུད་པའི་བོད་མི་ཕལ་མོ་ཆེའི་བློ་ལ་མི་འཐད་ངེས་པ་ཡིན་པས་སེམས་ཀྱི་གཏིང་ནས་ནམ་ཡང་ཁས་ལེན་ཐབས་བྲལ་བ་ཡིན། དེ་ལྟར་བོད་ཀྱི་སྐད་ཡིག་གཉིས་ཀྱི་གཅིག་གྱུར་རང་བཞིན་མདོ་ཙམ་བཤད་པ་ལགས།

རྩོམ་སྒྲིག་པ།  ཚེ་པེ།  གཡུ་འཛོམས།