ས་འདིར་དབྱར་རྩྭ་དགུན་འབུ་བཏབ་ཅིང་རྒྱ་མ་1000ཙམ་སྐྱེས་འདུག

རྩོམ་པ་པོ།   དུས་ཚོད།   2019-09-05   རྩོམ་ཁུངས།    ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།

                  ཉེ་ཆར། གསར་འགོད་པས་ཧུའུ་པེ་དབྱི་ཏུའུ་གྲོང་ཁྱེར་ཏུང་དབྱང་ཀོང་སྤྱི་གཉེར་ཁང་(湖北宜都市东阳光公司)ལས་ཤེས་རྟོགས་བྱུང་བར། སྤྱི་གཉེར་ཁང་དེས་ལོ་ངོ་10ཙམ་རིང་འབད་བརྩོན་བྱས་པ་བརྒྱུད། མིའི་ཐབས་ལ་བརྟེན་ནས་དབྱར་རྩྭ་དགུན་འབུ་འདེབས་འཛུགས་བྱེད་ཐུབ་ཡོད་ཅིང་། སྔོན་དཔག་བྱས་ན་ད་ལོར་དབྱར་རྩྭ་དགུན་འབུ་རྒྱ་མ་1000ཙམ་བསྡུ་ཐུབ་པ་རེད།   

                སྤྱི་གཉེར་ཁང་གི་འགན་འཁུར་བས་ངོ་སྤྲོད་བྱས་པ་ལྟར་ན། དབྱར་རྩྭ་དགུན་འབུ་འདེབས་སའི་ས་ནི་མཚོ་བོད་མཐོ་སྒང་ནས་དབོར་ཡོང་བ་ཡིན་ཞིང་། སྤྱི་གཉེར་ཁང་དེས་མིའི་ཐབས་ལ་བརྟེན་ནས་དབྱར་རྩྭ་དགུན་འབུ་འདེབས་འཛུགས་བྱེད་པའི་ལག་རྩལ་ལ་ལོ་ངོ་10རིང་ཚོད་ལྟ་བྱས་ཡོད་པ་རེད། 

                ཤེས་རྟོགས་བྱུང་བ་ལྟར་ན། ད་སྔའི་བར་གོང་གསལ་གྱི་སྤྱི་གཉེར་ཁང་ཕུད། ད་དུང་ཉུང་མཐའ་ཡང་མིའི་ཐབས་ལ་བརྟེན་ནས་དབྱར་རྩྭ་དགུན་འབུ་འདེབས་འཛུགས་བྱེད་ཡུལ་གསུམ་ཙམ་བྱུང་ཡོད་པ་སྟེ། གཅིག་ནི་བོད་ལྗོངས་ཀྱི་ལྷོ་ཕྱོགས་དང་། གཅིག་ནི་སི་ཁྲོན་གྱི་བྱང་ཕྱོགས། གཞན་གཅིག་ནི་གྲོང་ཁྱེར་ཁྲེང་ཏུའུ་ཡི་ཉེ་འགྲམ་བཅས་སུ་ཡོད་ཅིང་།  འདེབས་འཛུགས་བྱེད་ཐབས་ལ་ཞིབ་འཇུག་བྱེད་མཁན་ཡང་མི་ཉུང་བ་བྱུང་ཡོད་སྐད་འདུག 

                འདེབས་འཛུགས་བྱས་པའི་དབྱར་རྩྭ་དགུན་འབུ་ཡི་ཕྱི་དབྱིབས་སོགས་ནི་རང་བྱུང་ངང་སྐྱེས་པའི་དབྱར་རྩྭ་དགུན་འབུ་དང་ཕལ་ཆེར་གཅིག་འདྲ་ཡིན་མོད། འོན་ཀྱང་དེའི་གྲུབ་ཆ་དང་ཕན་ནུས་ནི་རང་བྱུང་གི་དབྱར་རྩྭ་དགུན་འབུ་ལས་ལྡབ་འགྱུར་གྱིས་ཞན་པ་རེད།  ཆེད་མཁས་པས་སྤྲི་དཀར་རྫས་སོགས་རྫས་འགྱུར་གྲུབ་ཆར་དབྱེ་ཞིབ་བྱས་རྗེས་འདེབས་འཛུགས་བྱས་པའི་དབྱར་རྩྭ་དགུན་འབུའི་ཕན་ནུས་དེ་རང་བྱུང་གི་དབྱར་རྩྭ་དགུན་འབུ་ལས་ཞན་པའི་རྒྱུ་མཚན་འགྲེལ་བརྗོད་བྱས་པ་གཤམ་གསལ་ལྟར། 

                དང་པོ། དེ་གཉིས་གྲུབ་བྱེད་ཀྱི་རྫས་རྒྱུ་མི་འདྲ་བ་སྟེ། རང་བྱུང་ངང་སྐྱེས་པའི་དབྱར་རྩྭ་དགུན་འབུ་ནི་འབུའི་ལུས་དང་དེ་ལས་སྐྱེས་པའི་ཤ་མོའི་རིགས་ཀྱི་རྫས་སྣ་གཉིས་ལས་གྲུབ་ཅིང་། མིའི་ཐབས་ལ་བརྟེན་ནས་འདེབས་འཛུགས་བྱས་པའི་དབྱར་རྩྭ་དགུན་འབུ་ནི་དབྱར་རྩྭའི་ཤ་མོ་ཡི་གྲུབ་རྫས་ཀྱི་རྨང་གཞིའི་སྟེང་སྐྱེས་པའི་ཤ་མོའི་རང་བཞིན་ཆེ་བའི་རྫས་གཅིག་པུ་ལས་གྲུབ་ལ། རང་བྱུང་གི་དབྱར་རྩྭ་དགུན་འབུ་ནི་རང་བྱུང་ཁམས་ནས་སྐྱེས་པའི་འབུའི་ལུས་ལས་བྱུང་བ་དང་། མིས་འདེབས་འཛུགས་བྱས་པ་དེ་ནི་མིས་ཐབས་ལ་བརྟེན་ནས་གསོས་པ་ཡིན་པས་དེ་གཉིས་ནང་འདུས་པའི་ཨན་ཅི་སྐྱུར་དང་། གཞི་རྒྱུ་སོགས་ཀྱི་འདུས་ཚད་ཀྱི་མང་ཉུང་ལ་ཁྱད་པར་ཆེན་པོ་ཡོད་པ་སྟེ། རང་བྱུང་གི་དབྱར་རྩྭའི་ཁྲོད་ཀྱི་གཞི་རྒྱུའི་མང་ཉུང་༩ཙམ་ཡིན་པའི་དབང་དུ་བཏང་ན། མིས་བཟོས་དབྱར་རྩྭའི་ནང་དེ་དག་གི་འདུས་ཚད་༡ཙམ་ལས་མེད་པས། མིའི་བདེ་ཐང་ལ་ཐོན་པའི་ཕན་ནུས་ཐད་ཁྱད་པར་ཆེན་པོ་ཡོད། 

                 གཉིས་པ། འཚར་སྐྱེས་དུས་ཡུན་མི་འདྲ་བ་སྟེ། རང་བྱུང་གི་དབྱར་རྩྭ་དགུན་འབུ་ཞིག་སྐྱེ་བར་ལོ་གཉིས་ནས་བཞིའི་དུས་ཡུན་དགོས་ཤིང་། ཡུན་རིང་གི་འཚར་སྐྱེའི་བརྒྱུད་རིམ་ཁྲོད་ད་གཟོད་དབྱར་རྩྭ་དགུན་འབུར་ཁྱད་དུ་ཡོད་པའི་ནད་འགོག་ནུས་པ་སོགས་རིམ་གྱིས་གྲུབ་བཞིན་ཡོད་པ་དང་།   མིས་འདེབས་འཛུགས་བྱས་པའི་དབྱར་རྩྭ་དགུན་འབུ་སྐྱེ་བའི་དུས་ཡུན་ནི་ཟླ་གསུམ་ནས་དྲུག་བར་ཡིན་པས། དུས་ཡུན་དེ་འདྲའི་ཐུང་བའི་ནང་རང་བྱུང་གི་དབྱར་རྩྭ་དགུན་འབུ་ལྟ་བུའི་ནད་འགོག་ནུས་པ་སྟོབས་དང་ལྡན་པ་ཞིག་གྲུབ་ཐབས་མེད་ལ། དེ་ནི་ང་ཚོས་ནམ་རྒྱུན་ཟ་བཞིན་པའི་ཤ་མོ་ལྟ་བུ་ཡིན་ཞིང་། དེར་འདུས་པའི་འཚོ་བཅུད་ནི་ཕལ་ཆེར་ཤ་མོ་ལྟ་བུ་ལས་མེད་དོ། །  

                གསུམ་པ། སྐྱེ་ཡུལ་མི་འདྲ་བ་སྟེ།  རང་བྱུང་གི་དབྱར་རྩྭ་དགུན་འབུ་སྐྱེ་ཡུལ་ནི་ས་བབ་མཐོ་ཚད་ལ་སྨི་བཞི་སྟོང་ཡན་ཟིན་པའི་ས་ཡིན་ཞིང་། ཁོར་ཡུག་ཤིན་ཏུ་གཙང་བས་སྦགས་བཙོག་ཅི་ཡང་མ་ཐེབས་པ་ཞིག་ཡིན་པ་མ་ཟད།   བོད་ཡུལ་ནི་ཉི་མ་ཤར་ཡུན་རིང་ཞིང་། ཉིན་མཚན་གྱི་དྲོ་གྲང་ལ་ཁྱད་པར་ཆེན་པོ་ཡོད་པས། ཉིན་མོའི་དྲོད་བསྡུས་པ་དེ་དག་དགོང་མོ་འཁྱག་པས་བསྡམས་ཏེ་དྲོད་བཅུད་དེ་ཉིན་ཁར་ཉིན་བྱས་ནས་བསྡུས་རྗེས་མཐར་བཅུད་མང་པོ་འདུས་པ་དང་།  མིས་འདེབས་འཛུགས་བྱས་པའི་དབྱར་རྩྭ་དགུན་འབུ་སྐྱེ་ཡུལ་ནི་དེ་ལས་ལྡོག་སྟེ་ཁོར་ཡུག་མི་གཙང་ས་ཡིན་པ་མ་ཟད། ད་དུང་མགྱོགས་པོར་སྐྱེ་ཆེད་རྫས་འགྱུར་བཏབ་པའི་ངེས་པ་ཆེན་པོ་ལྡན་པས་དེའི་གྲུབ་ཆར་སྐྱོན་ཐེབས་ཡོད།    

               དེ་བས། དབྱར་རྩྭ་དགུན་འབུ་ཉོ་མཁན་རྣམས་ཀྱིས་དབྱར་རྩྭ་ཉོ་སྐབས་ངེས་པར་དུ་ཡོང་ཁུངས་ལ་གསལ་ཆ་ཡོད་པའི་རང་བྱུང་གི་དབྱར་རྩྭ་དགུན་འབུ་ཉོ་བ་ལས། དྲ་ཐོག་སོགས་ལས་ཡོང་ཁུངས་མི་གསལ་བའི་དབྱར་རྩྭ་དགུན་འབུ་གང་བྱུང་དུ་ཉོ་མི་རུང་ངོ།།

རྩོམ་སྒྲིག་པ།  ཚེ་པེ།  གཡུ་འཛོམས།