བོད་ཀྱི་དམངས་གླུ་འགྲན་སྡུར་སྐབས་གཉིས་པ་ཡོངས་སུ་མཇུག་སྒྲིལ།

རྩོམ་པ་པོ།   དུས་ཚོད།   2019-08-29   རྩོམ་ཁུངས།    ​ཨ་མདོ་བརྙན་འཕྲིན་གྱི་འཕྲིན་སྟེགས།

                    ཨ་མདོ་བརྙན་འཕྲིན་གྱི་བོད་ཀྱི་དམངས་གླུ་འགྲན་སྡུར་སྐབས་གཉིས་པའི་འགྲན་སྡུར་གྱི་བརྒྱུད་རིམ་ཆ་ཚང་སྤྱི་ཟླ8པའི་ཚེས28ཉིན་མཚོ་སྔོན་རྒྱང་སྒྲོག་བརྙན་འཕྲིན་ཁང་གི་འཁྲབ་སྟོན་ཚོམས་ཆེན་ནས་ཡོངས་སུ་མཇུག་སྒྲིལ། 

                    ཨ་མདོ་བརྙན་འཕྲིན་གྱི་བོད་ཀྱི་དམངས་གླུ་འགྲན་སྡུར་ནི། བོད་ཀྱི་དམངས་གླུ་དང་དམངས་གླུའི་རིག་གནས་ཉམས་པ་སླར་གསོ་དང་མ་ཉམས་གོང་འཕེལ་གཏོང་བ་ལ་དམིགས་ནས། རྒྱ་ཆེ་བའི་དམངས་ཁྲོད་གླུ་བ་གླུ་མ་དག་ལ་ཆེད་དུ་བསྐྲུན་པའི་གར་སྟེགས་ཤིག་ཡིན་ཅིང་། ད་ལྟའི་བར་སྔ་ཕྱིར་ཐེངས་གཉིས་ལ་སྤེལ་ནས་བོད་ཀྱི་དམངས་གླུ་དང་དམངས་གླུའི་རིག་གནས་རྒྱུད་འཛིན་དར་སྤེལ་ལ་ནུས་པ་སྔ་ན་མེད་པ་ཞིག་ཐོན་དང་འདོན་བཞིན་ཡོད་པར་མ་ཟད།  རྒྱ་ཆེའི་ལྟ་མཁན་ཡོངས་ཀྱིས་ཆེས་དགའ་བསུ་ཐོབ་བཞིན་པའི་བརྙན་འཕྲིན་རིག་རྩལ་ལེ་ཚན་ཞིག་ཏུ་གྱུར་ཡོད་པ་རེད། 

རྟིང་རྩོད་ཀྱི་དཔྱད་འདེམ་པ།

རྟིང་རྩོད་ཀྱི་མདོ་འཛིན་པ།

                བོད་ཀྱི་དམངས་གླུ་འགྲན་སྡུར་སྐབས་གཉིས་པ་དེ་ཨ་མདོ་བརྙན་འཕྲིན་གྱིས་གཙོ་སྒྲུབ་དང་། རྔ་བ་ཁུལ་རྒྱང་སྒྲོག་བརྙན་འཕྲིན་ཁང་། ཀན་ལྷོ་རྒྱང་སྒྲོག་བརྙན་འཕྲིན་ཁང་། མཚོ་ནུབ་རྒྱང་སྒྲོག་བརྙན་འཕྲིན་ཁང་། མཚོ་ལྷོ་ཁུལ་བརྙན་འཕྲིན་ཁང་། རྨ་ལྷོ་ཁུལ་བརྙན་འཕྲིན་ཁང་། མཚོ་བྱང་ཁུལ་བརྙན་འཕྲིན་ཁང་། མགོ་ལོག་ཁུལ་བརྙན་འཕྲིན་ཁང་། དཔའ་རིས་བོད་རིགས་རང་སྐྱོང་རྫོང་མཉམ་འདྲེས་སྨྱན་སྦྱོར་ལྟེ་གནས་བཅས་ཀྱིས་རོགས་སྒྲུབ་གནང་བའི་བོད་ཀྱི་དམངས་གླུའི་འགྲན་ཚོགས་ཆེན་མོ་ཞིག་ཡིན་ཅིང་། འགྲན་ཚོགས་ལ་ཟི་ཁྲོན་འགྲན་ཁུལ་ནས་འགྲན་ཞུགས་པ19དང་། ཀན་ལྷོ་འགྲན་ཁུལ་ནས་འགྲན་ཞུགས་པ39 མཚོ་ལྷོ་འགྲན་ཁུལ་ནས་འགྲན་ཞུགས་པ49 རྨ་ལྷོ་འགྲན་ཁུལ་ནས་འགྲན་ཞུགས་པ36 མཚོ་ནུབ་འགྲན་ཁུལ་ནས་འགྲན་ཞུགས་པ37 མཚོ་བྱང་འགྲན་ཁུལ་ནས་འགྲན་ཞུགས་པ41 མགོ་ལོག་འགྲན་ཁུལ་ནས་འགྲན་ཞུགས་པ26 དཔའ་རིས་འགྲན་ཁུལ་གྱི་འགྲན་ཞུགས་པ59བཅས་ཁྱོན་བསྡོམས་འགྲན་ཞུགས་པ306ཞུགས་ཡོད་པ་རེད། 

རྟིང་རྩོད་དུ་ཚུད་པའི་འགྲན་ཞུགས་པ་བཅུ་དྲུག

 བཟང་པོ།                                                           སྐལ་བཟང་།

ཆོས་སྐྱོང་སྐྱབས།                                                      སྟག་མོ་མཚོ།

བདེ་སྐྱིད།                                                           འཕྲིན་ལས་ཚེ་རིང་།

ནོར་སྦྱིན་ལྷ་མོ།                                      བཀྲ་ཤིས་སྐྱིད།

དབང་མཚོ།                                                    ཚེ་མཁར་རྒྱལ།

ལྷ་སྐྱིད་རྒྱལ།                                        རྣམ་རྒྱལ་མགོན།

བདེ་ཆེན།                                                 པདྨ་རིག་འཛིན།

བསོད་ནམས་སྟོབས་ལྡན།                                               གཟུངས་མཚོ།


ཡུལ་དངོས་ལྟད་མོ་བས་འདེམ་ཤོག་འཕེན་བཞིན་པ།

རྟིང་རྩོད་ལ་སྟ་གོན་བྱེད་པ།

རྟིང་རྩོད་ཀྱི་བརྙན་ལེན་པ།

                མཚོ་སྔོན་དང་ཀན་སུའུ། ཟི་ཁྲོན་བཅས་ཞིང་ཆེན་གསུམ་གྱི་འགྲན་ཁུལ་བརྒྱད་ནས་འགྲན་ཞུགས་པ་སུམ་བརྒྱ་ལྷག་ཞུགས་ཡོད་པའི་བོད་ཀྱི་དམངས་གླུ་འགྲན་སྡུར་སྐབས་གཉིས་པ་དེ་སྤྱི་ཟླ6 པའི་ཚེས18ཉིན་མཚོ་ལྷོ་འགྲན་ཁུལ་ནས་ཐོག་མར་མགོ་བརྩམས་ཏེ་འགྲན་ཁུལ་སོ་སོ་ནས་ཛ་དྲག་ཆེ་བའི་འགྲན་སྡུར་རབ་དང་རིམ་པ་བརྒྱུད་མཐར་སྤྱི་ཟླ8པའི་ཚེས25ནས་ཉིན་བཞི་ཡི་རིང་ལ་གནའ་མཁར་ཟི་ལིང་ནས་བསྐྱར་འགྲན་དང་རྟིང་རྩོད་ཀྱི་རིམ་པ་སོགས་བརྒྱུད་དེ་བོད་ཀྱི་དམངས་གླུ་འགྲན་སྡུར་སྐབས་གཉིས་པའི་འགྲན་སྡུར་གྱི་བརྒྱུད་རིམ་ཆ་ཚང་ཡོངས་སུ་རྫོགས་པ་ལེགས་པར་གྲུབ་ནས་བཀྲ་ཤིས་པའི་ངང་མཇུག་བསྡུས་ཤིང་། ཚེས30ཉིན་གྱི་དགོང་མོའི་ཚུ་ཚོད་བདུན་དང་ཕྱེད་ཀའི་སྟེང་ཐེངས་འདིའི་འགྲན་ཚོགས་ཀྱི་བྱ་དགའ་སྟེར་བའི་དགོང་ཚོགས་བསྡུ་རྒྱུ་ཡིན་ཅིང་། སྐབས་དེར་བོད་ཀྱི་དམངས་གླུ་འགྲན་སྡུར་སྐབས་གཉིས་པའི་སྟེང་བྱ་དགའ་ཐོབ་པའི་འགྲན་ཞུགས་པའི་མིང་གསལ་བསྒྲགས་བྱ་རྒྱུ་ཡིན་པ་རེད། 

རྩོམ་སྒྲིག་པ། ཚེ་པེ།  གཡུ་འཛོམས།