སྦྲང་དཀར་ནས་ཀྱི་རྩམ་པ། ནད་གཞི་འགོག་པའི་ཟས་མཆོག

རྩོམ་པ་པོ།   དུས་ཚོད།   2019-08-14   རྩོམ་ཁུངས།    ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས།

                    རྩམ་པ་ནི་ལྟོ་བ་འགྲང་བྱེད་གཅིག་པུ་མ་ཡིན་པར། དེར་མི་ལུས་ལ་ཤིན་ཏུ་མཁོ་བའི་སྤྲི་དཀར་རྫས་དང་། ཐན་ཆུའི་འདྲེས་སྦྱོར་དངོས་པོ། ཨན་གཞི་སྐྱུར་རིགས་སྣ་བཅུ་བདུན། དེ་བཞིན་ལྕགས་དང་ཀེ། ཞིན་སོགས་ཚད་ཉུང་མ་རྒྱུ་དང་། འཚོ་བཅུད་B1སོགས་འདུས་པས། གཟུགས་གཞིའི་འབྱུང་ཁམས་གསོ་བ་དང་ནད་རིགས་ཀྱང་མང་པོ་ཞིག་སེལ་བའི་ཕན་ནུས་ཐོན་གྱི་ཡོད་པ་སྟེ། ཀྲུང་གོའི་བདེ་སྲུང་མཐུན་ཚོགས་ཀྱི་ཟས་རིགས་བདེ་འཇགས་ཨུ་ཡོན་ཚོགས་པའི་ཞིབ་འཇུག་ལས་ར་སྤྲོད་བྱུང་བ་ལྟར་ན། ནས་ཀྱི་ནང་དུ་སྐྲན་ནད་ཀྱི་ཕྲ་ཕུང་དང་ཕྲ་ཕུང་ངན་པ་གཞན་འཇོམས་པར་བྱེད་པའི་རྒྱུ་སྟེ་དམའ་འདུས་མངར་ཆ་ཞེས་པ་འདུས་ཡོད་པས། སྐྲན་ནད་སོགས་སྔོན་འགོག་ཡོང་བར་ཕན་པ་ཆེན་པོ་ཡོད་པ་རེད། 

                  གཞན་ཡང་གོང་གི་བརྙན་ཐུང་ནང་གསལ་བ་ལྟར།  ནས་ཀྱི་ནང་དུ་བཟའ་བཅའི་ཚི་སྣ་ཞེས་པའི་རྫས་ཤིག་ཡོད་པ་དེས་ཕོ་བ་དང་རྒྱུ་མར་ཡོད་པའི་ནད་བསྐྱེད་རྫས་རྒྱུ་མེད་པར་གཏོང་ཞིང་། ཕོ་བ་དང་རྒྱུ་མའི་སྐྲན་ནད་སྔོན་འགོག་བྱེད་པ་མ་ཟད། ད་དུང་ཁྲག་ཏུ་འདུས་པའི་མཁྲིས་རྒྱུའི་གཤེར་རྩི་ཉུང་དུ་བཏང་ནས་སྙིང་ནད་སོགས་སྔོན་འགོག་ཡོང་བར་ཕན་པ་དང་། དེ་མིན་ནས་སུ་འདུས་པའི་རྫས་རྒྱུ་གཞན་མང་པོས་མིའི་ནད་འགོག་ནུས་པ་ཆེ་རུ་གཏོང་ཐུབ་ཀྱི་ཡོད། 

                   བོད་ཀྱི་དམངས་ཁྲོད་དུ་ཆམ་ནད་ཕོག་ན་རྩམ་པ་ཟོ་ཞེས་ཆམ་པའི་ནད་སོགས་ཕོག་སྐབས་རྩམ་པ་བཟས་ན་ཕན་ཐོགས་ཡོད་པའི་ཤོད་སྲོལ་ཡོད། དེ་བཞིན་རྒན་འཁོགས་སོགས་ལ་རླུང་ནད་བྱུང་ན་རྩམ་ཐུག་བསྐོལ་ཏེ་འཐུང་ན་ཕན་པ་དང༌། དེ་མིན་ཐག་རིང་དུ་སོང་སྟེ་ངལ་དུབ་ཀྱིས་རྐང་ལག་ན་ཚེ་རྩམ་བྱུགས་བརྒྱབ་ན་ཕན་པས་དམངས་ཁྲོད་དུའང་རྩམ་པ་ལ་བརྟེན་ནས་ནད་བཅོས་བྱེད་ཐབས་སྣ་ཚོགས་ཡོད།

                      གཞན་སྨན་གཞུང་དུ། སྟོན་དུས་ར་མཉེའི་རྩ་བ་བརྐོས་པ་གཙང་སེལ་གྲིབ་སྐམ་བྱས་པའི་ཕྱེ་མ་རྩམ་པ་དང་བསྲེས་ནས་ཐུག་པ་དང་། ཟན་ཆང་བསྐོལ་ཏེ་བསྟེན་པས་ཆུ་སེར་གྱི་ནད་དང་རྒས་ཀ་སྲ་བ་ལ་ཕན་ཚུལ་དང་། དེ་མིན་གག་ལྷོག་གཟེར་གསུམ་སོགས་གཉན་ནད་རིགས་གློ་བུར་དུ་བྱུང་ན་གྲོ་ཕྱེ་དང་། ནས་ཕྱེ། རྩམ་པ་སོགས་ཀྱིས་ཕན་ཚུལ། གཞན་སྙིང་ནད་དང་བུད་མེད་ཀྱི་ཆུ་སྦོས་ནད་སོགས་ལའང་ཕན་ཚུལ་སོགས་ཡོད་པར་བཤད་འདུག 

རྩོམ་སྒྲིག་པ།  ཚེ་པེ།  གཡུ་འཛོམས།