མཛའ་གཞས་ཀྱི་ལྷག་རོ།

རྩོམ་པ་པོ།   སྒྲོལ་མ་འཚོ།དུས་ཚོད།   2018-10-25   རྩོམ་ཁུངས།    རྔ་བའི་གསར་འགྱུར་ཚགས་པར།

ང་རང་དབུས་སུ་ཕྱིན་ཏེ།།

ཀ་བར་དཀྲིས་གསུམ་བརྒྱབ་པ།།

ཀ་བ་བསམས་པ་མིན་ཏེ།།

གདུང་མ་བསམས་པ་ཡིན་སོང་།།

དགུང་གི་ཁྲི་གདུགས་ཉི་མ།།

ཁྱད་མེད་གླིང་བཞིར་འཕྲོས་འདུག།

གོལ་ཁུང་ནང་གི་མེ་ལྕེ།།

ང་ཡི་ཕྱོགས་སུ་མཆེད་ཡོད།།

ཆར་དེ་ཆུ་མོའི་བགྲོད་རོགས།།

ཡིན་འགྲོ་བསམས་ན་དགའ་བ།།

ཆར་དེ་སེར་བའི་སྣ་འདྲེན།

ཡིན་འགྲོ་བསམས་པ་ཨེ་གནང་།།

དཀར་ཡོལ་རྒྱལ་སྲིད་སྣ་བདུན།།

ལྷ་ཁང་ནང་དུ་བཞུགས་ཚེ།།

ང་རང་ཕྱེ་མར་ཆས་ཏེ།།

མཆོད་པའི་རྫས་སུ་ཕེབས་ཆོག།

དུངས་པའི་མིག་གི་མཐའ་ལ།།

བརྩེ་བའི་མཆི་མ་ཤམ་ཤམ།།

དྲན་པས་གདུངས་པ་མིན་ཚེ།།

མགོ་རུས་བངས་དགོས་མི་འདུག།

བྱམས་པས་བྱབས་བྱབས་བཏང་བ།།

འཇམ་པ་བལ་ལས་འཇམ་སོང་།།

གླིང་ཆེན་མཚོ་རུ་འཇུས་པའི།།

བདེ་བ་དེ་དང་འདྲ་བྱུང་།།

རི་ལ་རི་ཆེན་རི་ཆུང་།།

རི་ཆེན་གཡང་ཆགས་རི་ཡིན།།

རི་ཆུང་བཀྲ་ཤིས་ལྷ་སྒང་།།

རི་ཆེན་བསྐོར་ཏེ་ཆགས་ཡོད།།

ཆུ་ལ་ཆུ་ཆེན་ཆུ་ཆུང་།།

ཆུ་ཆེན་རྨ་ཆུ་འབྲི་ཆུ།།

རི་བོའི་ཤོད་དུ་བབས་ཀྱང་།།

ཆུ་མགོ་གངས་ཀྱིས་བཟུང་ཡོད།།

མཚོ་དེ་ཡར་འབྲོག་གཡུ་མཚོ།།

ཉ་དེ་གསེར་མིག་ཉ་མོ།།

མཚོ་མོ་དྭངས་ཤིང་བསིལ་བ།།

ཉ་མོར་འཁྱུག་རྩལ་རྫོགས་པ།།

ཁྱེད་ནི་ངང་བའི་རྒྱལ་བོ།།

མཚོ་མཐའ་འདི་རུ་འཁོར་ཤོག།

མེ་ལོང་འདྲ་བའི་བསིལ་ཆུས།།

ཁྲུས་ཤིག་ཁྱེད་ལ་གསོལ་ཆོག།།

མ་ཐོབ་ཆུང་འདྲིས་བྱམས་པ།།

ཡ་གའི་དབང་བོའི་གཞུ་རིས།།

བསྙབས་འདོད་བློ་རུ་སྐྱེས་ཀྱང་།།

ལག་ལ་ཟིན་རྒྱུ་མ་བྱུང་།།

ཉི་རྩེ་དབུས་སུ་ཕོག་པ།།

དབུས་ཁུལ་གསེར་གྱི་གླིང་ཕྲན།།

གླིང་འདི་བསྐལ་བརྒྱར་བརྟན་ཚེ།།

གསེར་དབྱུགས་ང་ཡིས་བརྒྱབ་ཆོག།

དབྱར་གསུམ་ཆར་ཆུ་མོད་དེ།།

ལུས་ཀྱིི་གོས་ལྭ་བངས་ཀྱང་།།

གནམ་ལ་ལེ་ཁག་མ་དཀྲི།

ཀླུ་རྒྱལ་ཐུགས་སེམས་བཞེང་འགྲོ།

སྤྲིན་པ་ཁ་དཀར་གཏིང་གནག།

ལྷོ་ནས་བྱང་དུ་ལྡང་སྟེ།།

གླིང་བཞི་བསྒྲིབས་གྲབས་མཛད་པས།།

ཉི་མའི་དགྲ་རུ་ལངས་སོང་།།

གནས་མཆོག་མཚེ་མ་གྲོང་དེ།།

བསོད་ནམས་ཅན་གྱི་ཡུལ་རེད།།

རྒྱལ་དབང་བདུན་པའི་རྗེས་སུ།།

རྡོ་རིང་མཆོག་སྤྲུལ་འཁྲུངས་པ།།

འདུ་ཁང་ཕོ་བྲང་དཀར་དམར།།

ལི་ཐང་ཡུལ་དུ་མཛེས་པ།།

དགེ་བཤེས་དོན་གྲུབ་རྒྱ་མཚོའི།།

མཛད་རྣམ་ཡིད་ལ་འཁོར་བྱུང་།།

ལི་ཐང་ཡུལ་གྱི་ཇོ་བོ།།

ཇོ་བོ་མི་འགྲོ་གསུང་བྱོན།།

ལན་གཅིག་མཇལ་རྒྱུ་བྱུང་བས།།

ལུས་ཀྱི་སྡིག་གྲིབ་དག་སོང་།།

བྱང་གི་རྨ་ཆེན་སྤོམ་ར།།

ཆོས་བསོད་ཅན་གྱི་ཡུལ་ཡིན།།

དེ་ལ་དཀྲིས་གསུམ་རྒྱོབ་དང་།།

ལུས་ཀྱི་སྡིག་གྲིབ་དག་ཡོང་།།

རྩོམ་སྒྲིག་པ།  ཚེ་པེ།