རྔ་ཡུལ་འཚམས་རིང་ཇོ་བོའི་ལོ་རྒྱུས་རགས་བསྡུས།

རྩོམ་པ་པོ།   དུས་ཚོད།   2018-09-19   རྩོམ་ཁུངས།    རྔ་བའི་གསར་འགྱུར་དྲ་བ།

       

       འཚམས་རིང་ཇོ་བོ་ནི་སྒོ་མང་ཡུལ་ཚོའི་སྲིད་གཞུང་གི་ཤར་ལྷོའི་ཕྱོགས་སུ་སྤྱི་ལེ་གསུམ་ཡས་མས་ཀྱི་འཚམས་རིང་སྡེ་བའི་སྒར་བ་འགབ་མ་ཚང་ཞེས་པའི་ཁྱིམ་ཚང་དུ་ཡོད་ཅིང་།ནམ་རྒྱུན་རྔ་ཡུལ་སྟོད་སྨད་བར་གསུམ་གཙོས། ཕྱོགས་བཞི་མཚམས་བརྒྱད་ནས་དད་ལྡན་གྱི་མཇལ་བ་རྣམས་ཆར་རྗེས་ཀྱི་ཤ་མོ་བརྡོལ་བ་བཞིན་ཡོང་གིན་ཡོད་ལ།ད་དུང་ལྷ་སའི་ཇོ་བོར་མ་མཇལ་གོང་།འཚམས་རིང་ཇོ་བོར་མཇལ་དགོས་ཞེས་པའི་བཤད་སྲོལ་ཡང་ཡོད་དོ།།

       ཇོ་སྐུའི་འབྱུང་ཁུངས་ནི་ངག་རྒྱུན་གཙོར་བཟུང་ནས་བྲིས་པ་སྟེ།དུས་རབས་བཅུ་བདུན་པའི་དུས་འགོར་སྡེ་སྲིད་སངས་རྒྱས་རྒྱ་མཚོས་རྒྱལ་དབང་ལྔ་བའི་ཡང་སྲིད་འཚོལ་ཕྱིར་མདོ་སྨད་ཕྱོགས་སུ་ཨ་སྐྱོའི་ཚུལ་ཏུ་ཕེབས་བསྒྱུར་གནང་སྟེ། ཐོག་མར་མཚོ་སྔོན་གྱི་ཕྱོགས་ནས་བརྒྱུད་དེ་རེབ་གོང་སོགས་སུ་ཕེབས་ཤིང་།དེ་ནས་ཀན་ལྷོ་སོགས་བརྒྱུད་ནས་སི་ཁྲོན་རྔ་བ་རུ་ཕེབས་སྐབས།ཉིན་ཞིག་འཚམས་རིང་དཔོན་རྒན་ཕྱིར་ཕ་ཡུལ་དུ་ལོག་པའི་ལམ་ཁ་ནས་སྡེ་སྲིད་དང་ངོ་འཕྲད་དེ། སྡེ་སྲིད་ཀྱིས་འཚམས་རིང་དཔོན་རྒན་ལ་གནས་ཚང་ཞིག་གཡར་རྒྱུའི་རེ་བ་ཞུས་པས།འཚམས་རིང་དཔོན་རྒན་གྱིས་དཔོན་ཁྱིམ་དུ་གདན་དྲངས་ཏེ་སྣེ་ལེན་རྒྱ་ཆེར་བྱས་ཤིང་།ཞག་མ་བདུན་ལ་བཞུགས་པར་བཤད། ཉིན་དེ་དག་གི་རིང་ལ་འཚམས་རིང་དཔོན་པོས་སྡེ་སྲིད་ལ་རོགས་རམ་གང་མང་བྱེད་པ་དང་། ཉིན་ཞིག་དཔོན་རྒན་གྱིས་ཁོང་ལ་ཡི་གེ་ཤེས་སམ་ཞེས་དྲིས་པར་ཅུང་ཙམ་ཤེས་ཞེས་གསུངས། དཔོན་རྒན་གྱིས་སྐལ་བཟང་གི་གླེགས་བམ་གསེར་བྲིས་མ་ཞིག་ཡོད་པ་དེ་ཁོང་ལ་ཀློག་ཏུ་བཅུག་པ་དང་། དཔོན་རྒན་གྱིས་ཡང་དང་འོར་གྱིས་གླེགས་བམ་འདི་ལ་ལག་འཇམ་པོས་ཀློག་དགོས་པ་ལས་རྩུབ་རེག་དང་ཉོག་རྫོབ་མི་བྱ་བ་དང་། གཞུག་མ་རྣམས་ཀྱིས་བཀླག་དགོས་ཚུལ་སོགས་ཀྱི་རེ་བ་བཏོན་པར། སྐལ་བཟང་གི་གླེགས་བམ་མཇུག་ཏུ་སྡེ་སྲིད་ཁོང་གིས་ཀུ་རེའི་ཚུལ་དུ། གཞན་པའི་ལག་ཏུ་འདོན་རྒྱུ་མི་རྙེད་པ་ཞིག་ཡིན་སྲིད་ཀྱང་ང་ཡང་མི་སྤྱིར་བཏང་བ་ཞིག་ཡིན་པས་གདོན་དུ་མི་རྙེད་པ་ཞིག་ཡིན་ཞེས་བྲིས་འདུག་པ་ལོ་མང་པོའི་རྗེས་སུ་ད་གཟོད་མཐོང་བར་བཤད་དོ།།

         ཉིན་བདུན་གྱི་གཞུག་ཏུ་སྡེ་སྲིད་སངས་རྒྱས་རྒྱ་མཚོ་སྡེ་དགེ་རུ་འགྲོ་གྲབས་བྱས་པས། འཚམས་རིང་དཔོན་རྒན་གྱིས་ཁོང་ལ་དྲེལ་བུ་ཤ་ཤེད་རྒྱས་པ་ཞིག་ཕུལ་ནས་སྐྱེལ་མ་མཛད། འགྲོ་ཁར་སྡེ་སྲིད་ཁོང་གིས་ནན་ཏན་གྱིས། དཔོན་པོ་གཞུག་ནས་སྟོད་ཉི་མ་ལྷ་སར་བསླེབ་པའི་བསྐལ་བ་རེ་བྱུང་ན། ངས་ཀྱང་ཁྱོད་ལ་རོགས་རམ་ཕྲན་བུ་རེ་ཐོན་ཨེ་ཐུབ་བལྟ་ཞེས་གསུངས་པ་དང་། མཚན་ལ་སྡེ་སྲིད་མགོ་ཆེ་ཟེར་ཞུས་ནས་ཆིབས་བསྒྱུར་གནང་བས་འཚམས་རིང་དཔོན་པོ་དགའ་སྤྲོ་ཚད་མེད་སྐྱེས་རབས་སོགས་བཤད་སྲོལ་ཡོད་དོ།།

          ལོ་ཁ་ཤས་ཀྱི་རྗེས་སུ་འཚམས་རིང་དཔོན་པོ་ཏག་ཏག་བསོད་ནམས་ཀྱི་མཐུ་ལས་ལྷ་སར་འགྲོ་རྒྱུའི་བསྐལ་བ་ལྡན་པས། ཉིན་ཐོག་ཟླ་བརྩེགས་དང་ཟླ་ཐོག་ལོ་བརྩེགས་ཏེ་ལམ་བར་ནས་ཉེ་ཞོ་མེད་པར་ལྷ་སར་འབྱོར་ཞིང་། སྔོན་གྱི་ཨ་སྐྱོ་དེ་འཚོལ་དགོས་བསམས་ཏེ། སེ་རའི་སྒོ་ལྷའི་རྩར་ཁྲོམ་ཆེན་དུ་ཐོན་པ་ན། སྡེ་སྲིད་མགོ་ཆེ་ཨེ་ཤེས་ཞེས་གང་ས་གང་དུ་ཡང་ཡང་དྲིས་པར། ཚང་མས་དེ་ལྟར་བོས་ན་ཁྱོད་བོད་གཞུང་གིས་ཁྲིམས་ལ་སྦྱོར་ངེས་རེད་ཅེས་བཤད་མོད། ཁོས་དོ་སྣང་མ་བྱས་པར་ཕོ་བྲང་པོ་ཏ་ལའི་ཞོལ་ནས་ཀྱང་སྡེ་སྲིད་མགོ་ཆེ་འདི་རུ་བཞུགས་སམ་ཞེས་ཡང་ཡང་དྲིས་པས། སྒོ་གཉེར་གྱིས་སྨྱོན་པ་ཞིག་ཐོན་འདུག་ཅེས་ཕྱིར་བདའ་རྩིས་བྱས། རེད་དེ། སྐབས་དེར་སྡེ་སྲིད་ཀྱིས་ཐོས་ཏེ། ཁོ་ནི་ཨ་མདོའི་ཡུལ་ནས་ཡོང་བའི་འགྲུལ་བ་གལ་ཆེན་ཞིག་ཡིན་ཞེས་པོ་ཏ་ལའི་ནང་དུ་ཁྲིད་དེ་སྣེ་ལེན་བྱས།

         འཚམས་རིང་དཔོན་པོས་དབུས་མཇལ་གྲུབ་པ་དང་། གཞུག་ཏུ་ཕྱིར་ཡུལ་དུ་ལོག་ཁར་སྡེ་སྲིད་ཀྱིས་ཁོ་གཟིམ་ཁང་དུ་ཁྲིད་དེ། ཁོང་གི་གཟིམ་ཁང་དུ་བཞུགས་པའི་ཇོ་སྐུ་རྣམས་ལས་རྟེན་འགངས་ཆེན་ཞིག་འདེམས་དང་ཁྱོད་ལ་རྟེན་སྐལ་དུ་སྦྱིན་གསུངས་པར། ཁོས་སྡེ་སྲིད་ཀྱི་གཟིམ་སྔས་ཀྱི་ཇོ་སྐུ་དེ་བསླངས་པས། སྡེ་སྲིད་ཀྱིས་སྐུ་དེ་ཧ་ཅང་བྱིན་ཆེན་ཡིན་མོད། འགྲུལ་བ་གལ་ཆེན་ལ་རྟེན་གལ་ཆེན་དེ་གནང་བར་བྱའོ་ཞེས་གནང་བར་བཤད་དོ།།

          འཚམས་རིང་དཔོན་པོར་ཇོ་སྐུ་གནང་རྗེས། དཔོན་རྒན་གྱིས་ཁོ་ནི་མི་ཉམ་ཆུང་འཁོས་ཞན་ཞིག་ཡིན་པས། གཞན་གྱིས་རྐུ་འཕྲོག་བཅོམ་གསུམ་ལ་ཤིན་ཏུ་དོགས་པས། སྡེ་སྲིད་ཁྱེད་ཀྱིས་སྲུང་མ་བཙན་པོ་ཞིག་འགོད་དགོས་པའི་རེ་བ་ནན་གྱིས་ཞུས་པས། སྡེ་སྲིད་ཀྱིས་བསེ་ཁྲབ་སྲུང་མར་བཀོད་པ་དང་། རིག་གསར་སོགས་ཀྱི་སྐབས་སུ་རྐུ་འཕྲོག་གཏོར་གསུམ་ཀྱི་འཇིགས་པ་མང་དུ་བརྒྱུད་མྱོང་ཡང་། ད་ལྟ་ད་དུང་སྒར་བ་ཞེས་པའི་ཁྱིམ་ཚང་དུ་བཞུགས་ཐུབ་པ་ཡང་སྲུང་མའི་བཀའ་དྲིན་ཡིན་ཚུལ་བཤད་སྲོལ་ཡོད། བསེ་ཁྲབ་ནི་ད་ལྟ་འཚམས་རིང་སྡེ་བས་གསོལ་མཆོད་གྱི་སྲུང་མ་གལ་ཆེན་ཞིག་ཏུ་གྱུར་ཡོད་དོ།།

         འཚམས་རིང་དཔོན་པོ་རིམ་བྱོན།

         འཚམས་རིང་དཔོན་རྒན་གྱི་ཡར་སྔོན་དུ་འཚམས་རིང་མདུང་ནག་ཆོས་རྗེ་སོགས་ངག་རྒྱུན་དུ་སྣང་ཡང་འབྲེལ་ཡོད་ཀྱི་ཡིག་ཆ་སོགས་ལག་སོན་མ་བྱུང་བས། འདིར་འཚམས་རིང་དཔོན་རྒན་ནས་རིམ་བཞིན་བཀོད་པ་སྟེ།འཚམས་རིང་དཔོན་རྒན་གྱི་བུ་ལྷ་ཐར་དང་།དེའི་བུ་འཕགས་ཝེ།དེའི་བུ་སྐལ་བཟང་མགོན། དེའི་བུ་འཇིགས་ལོ་དང་སྔགས་བསམ།སྒར་མགོན།བཤད་སྒྲུབ།དཔལ་འཛིན།བློ་མཆོག།གུར་མགོན་བཅས་སྤུན་བདུན་ཡོད། དེ་ནས་གུར་མགོན་གྱི་བུ་དབང་ཕྱུག་དང་།དེའི་བུ་ད་ལྟའི་བསེ་ཁྲབ་སྐྱབས།དེའི་བུ་མཁྱེན་རབ་ཡིན་ནོ།།

རྩོམ་སྒྲིག་པ། ཚེ་པེ།  གཡུ་འཛོམས།