འོལ་མོ་ལུང་རིངས།

རྩོམ་པ་པོ།   དུས་ཚོད།   2018-07-19   རྩོམ་ཁུངས།    རྔ་བའི་གསར་འགྱུར་དྲ་བ།

                    ད་ལྟའི་དུས་སུ་ཞང་ཞུང་ཟེར་བའི་མིང་གི་གདགས་གཞིའི་ལྟེ་བ་ནི་སྟོད་མངའ་རིས་ཀྱི་ཕྱོགས་སུ་ཡིན་ལ། དེའི་ནང་ནས་ཀྱང་བོན་བསྟན་ཐོག་མའི་འབྱུང་ཁུངས་འཁྲུལ་པ་དང་བྲལ་བ་ནི་རྒྱལ་སའི་ལྟེ་བ་འོལ་མོ་ལུང་རིངས་ཞེས་སུ་གྲགས།

རྒྱ་ཡིག་གི་མིང་། 沃莫隆仁

གནས་ཡུལ། གུ་གེ་ཞེས་བྱ་བའི་ཡུལ་གྱི་དབུས་སུ་ཡོད།

བོན་བསྟན་འབྱུང་ཡུལ། འོལ་མོ་ལུང་རིངས།

བོན་བསྟན་སྲོལ་འབྱེད་མཁན། སྟོན་པ་གཤེན་རབ་མི་བོ་ཆེ།

༡ གཤེན་ཡུལ་འོལ་མོ་ལུང་རིངས།

                       སྟོན་པ་གཤེན་རབ་ཀྱི་འཁྲུངས་ཡུལ་དང་གཡུང་དྲུང་བོན་ཐོག་མར་དར་སའི་ཡུལ། དེ་ཡང《མདོ་གཟེར་མིག》ལས། འཇིག་རྟེན་གྱི་ཁམས་ནུབ་ཕྱོགས་ཀྱི་གླིང་། ཆུ་བོ་བཞི་འདུས་ཀྱི་འགོ ལྷོའི་འཛམ་བུ་གླིང་གི་དམིག འོལ་མོ་ལུང་རིངས། མཁར་བར་པོ་སོ་བརྒྱད་ཀྱི་ནང་ཞེས་པའོ།།

                       དེ་ཡང་འོལ་མོ་ལུང་རིངས་དེ་ཞིང་གཞན་ལས་ཁྱད་དུ་འཕགས་པའི་ཡོན་ཏན་ཆེན་པོ་བདུན་དང་ལྡན་པ་ཡིན་ཏེ། བསྟན་པ་རྣམ་གསུམ་རྗེས་སུ་བཞག་པ། སྐུ་གསུང་ཐུགས་ཀྱི་བསྟན་པ་མ་རྫོགས་པར་བསྟན་པ། ལོག་པ་གཞན་གྱིས་བསྟན་པ་བསྣུབ་མི་ཐུབ་པར་བསྟན་པ་གནས་པ། ཞིང་དེའི་མི་རྣམས་ལོག་པའི་ཆོས་སྒོར་བཅུག་མི་ནུས་པས་ལོག་ཆོས་སྤྱོད་པ་མེད་པ། རྫུ་འཕྲུལ་ཅན་མ་གཏོགས་ལོག་པའི་སྡེ་དང་གཞན་དག་གང་གིས་ཀྱང་དབལ་སོ་གངས་ཀྱི་རྭ་བ་ལས་བརྒལ་མི་ནུས་པས་ཕལ་གྱིས་སྤྱོད་ཡུལ་དུ་མ་གྱུར། སངས་རྒྱས་ཀྱི་བསྟན་པ་མ་རྫོགས་ཀྱི་བར་དུ་དགེ་སྤྱོད་ཀྱི་སྲོལ་མི་ཉམས་པ། ཞིང་དེར་སྐྱེས་པའི་མི་རྣམས་མི་ཁོམ་པའི་གནས་དང་ངན་སོང་སོགས་ལོག་པར་མི་ལྷུང་བ་ཀུན་ཀྱང་དག་པའི་ཞིང་ནས་ཞིང་དུ་བགྲོད་མཐར་མངོན་འཚང་རྒྱ་བ་དང་བཅས་སོ།།

                       ད་ལྟའི་དུས་སུ་ཞང་ཞུང་ཟེར་བའི་མིང་གི་གདགས་གཞིའི་ལྟེ་བ་ནི་སྟོད་མངའ་རིས་ཀྱི་ཕྱོགས་སུ་ཡིན་ལ།དེའི་ནང་ནས་ཀྱང་བོན་བསྟན་ཐོག་མའི་འབྱུང་ཁུངས་འཁྲུལ་པ་དང་བྲལ་བ་ནི་རྒྱལ་སའི་ལྟེ་བ་འོལ་མོ་ལུང་རིངས་ཞེས་སུ་གྲགས་པ། དེང་དུས་ལ་གུ་གེ་ཞེས་བྱ་བའི་ཡུལ་གྱི་དབུས། གངས་ཏེ་སེའི་མདུན། མཚོ་མ་ཕམ་གྱི་འགྲམ་ངོས་སུ་ཡོད་པའི་གནས་ཡུལ་དེ་ཡིན། གནས་ཡུལ་དེར་བོད་མི་རྣམས་ཀྱིས་ཡུལ་ཁྱད་པར་ཅན་ཞིག་ཏུ་ངོས་འཛིན་སྲོལ་ཡོད་པ་མ་ཟད། གནའ་རབས་བོན་གྱི་ཡིག་རྙིང་མ་དག་ལས་སྟོན་པ་གཤེན་རབ་ཀྱི་འཁྲུངས་ཡུལ་དང༌། ཁོང་གི་བོན་བསྟན་པའི་གནས་དེ་ནི་གངས་ཏེ་སེའི་མདུན། མཚོ་མ་ཕམ་གྱི་འགྲམ་འོལ་མོ་ལུང་རིངས་ཞེས་བྱ་བ་དེ་ཡིན་ཞེས་གསལ་བོར་བཤད་ཡོད་པ་རེད། བོན་གྱི་ཡིག་རྙིང《སྲིད་པ་སྤྱི་མདོས》ལས། ཡ་ཀའི་སྐྱིད་པའི་ཡུལ། ཉམས་དགའ་བག་རེ་བྲོ། ཆུ་རྒྱལ་བཞི་འདུས་མགོ  རི་རྒྱལ་ཏེ་སེའི་མདུན། མཚོ་རྒྱལ་མ་ཕམ་འགྲམ། འོལ་ལུང་གཡུ་ཡི་མཁར། བཞུགས་གནས་ངོ་རེ་མཚར། ཞེས་གཤེན་རབ་མི་བོ་ཆེ་གང་དུ་བཞུགས་པའི་གནས་ཡུལ་དེ་ནི་ཆུ་བོ་ཆེན་པོའི་མགོ། གངས་ཏེ་སེའི་གདུན། མཚོ་མ་ཕམ་གྱི་འགྲམ། འོལ་མོ་ལུང་རིངས་གཡུ་ཡི་མཁར། ཞེས་གསལ་བོར་བསྟན་ཡོད་པ་དང༌། དེ་བཞིན་དུ《ལེགས་བཤད་རིན་པོ་ཆེའི་མཛོད》ལས། གཤེན་ཡུལ་འོལ་མོ་ལུང་རིངས་ནི། དཔག་ཚད་ལྔ་བཅུ་ཆུ་ཞེང་མཉམ། གླིང་བཞི་རི་རབ་ཚུལ་དུ་གྲུབ། འཛམ་བུ་པྲིཀྵྲ་ཤིང་གི་རྩ། རི་བོ་གངས་ཅན་ཏེ་སེའི་དྲུང༌། མཚོ་ནི་མ་ཕམ་གཡུ་མཚོའི་འགྲམ། ཆུ་བོ་ཆེ་པོ་བཞི་འདུས་མགོ། སྤོས་རི་ངད་ལྡན་ཉེ་བའི་ས། ཞེས་གསུངས་པ་འདིས་ཞང་ཞུང་གི་ཡུལ་གྱི་དབུས་དེར་འོལ་མོ་ལུང་རིངས་སུ་ཡོད་པ་གསལ་པོ་བསྟན་ཡོད་པ་ཡིན། དུས་གསུམ་གཤེན་རབས་ཀྱི་འབྱུང་ཁུངས《མདོ་ཟེར་མིག》ལས། སྟོན་པ་དང་པོ་མིའི་ཡུལ་དུ་སྐྱེ་བ་ལ། འཇིག་རྟེན་གྱི་ཁམས་ནུབ་ཕྱོགས་ཀྱི་གླིང༌། ཆུ་བོ་བཞི་འདུས་ཀྱི་མགོ ལྷོ་འཛམ་བུ་གླིང་གི་དམིག་འོལ་མོ་ལུང་རིངས། མཁར་བར་པོ་སོ་བརྒྱད་ཀྱི་ནང་དུ། ཡབ་རྒྱལ་བོན་ཐོད་དཀར་གཟིམས་པའི་སྤྱི་བོའི་གཙུག་ཏུ་བབས། ཞེས་སྟོན་པ་སྐྱེ་བ་བཞེས་པའི་གནས་ཡུལ་གསལ་བོར་བསྟན་ཡོད་པ་རེད། གོང་གི་ལུང་རྒྱུན་དེ་དག་ལ་དཔག་ན། གཤེན་རབ་མི་བོ་ཆེ་དེར་ཞང་ཞུང་གི་ཡུལ་འོལ་མོ་ལུང་རིངས་སུ་སྐུ་བལྟམས་ནས་གཡུང་དྲུང་བོན་གྱི་བསྟན་པ་སྤེལ་བར་ཤེས་ཐུབ་པ་མ་ཟད། ཡུལ་དེའང་གཤེན་ཡུལ་འོལ་མོ་ལུང་རིངས་ཞེས་བརྗོད་དེ། 《མདོ་གཟེར་མིག》ལས། གཤེན་ཡུལ་འོལ་མོ་ལུང་རིངས་ན། སྟོན་པ་གཤེན་རབས་མི་བོ་ནི། སློབ་མ་འབུམ་ཕྲག་མཐའ་ཡས་ལ་ཞེས་གསལ་བོར་བསྟན་ཡོད་པས་སོ། །

                     དེ་ལྟར་ཚུལ་དེ་དག་ལ་ལེགས་པར་དཔྱད་ན། གནའ་རབས་དུས་སུ་འོལ་མོ་ལུང་རིངས་ཀྱི་གནས་ཡུལ་ནི་ཡུལ་ངོ་མཚར་ཅན་ཞིག་ཡིན་པར་ངེས་ཤེས་བརྟན་པོར་རྙེད་ཐུབ་པ་རེད། དེའང་ཁྱད་པར་ཅན་གྱི་གནས་ཡུལ་དེར་ཁྱད་པར་ཅན་གྱི་ལོ་རྒྱུས་མང་པོར་ཡོད་ངེས་པ་ནི་བཤད་མ་དགོས་པ་རེད། ཆོས་ལུགས་མི་འདྲ་བའི་གྲུབ་མཐའ་སོ་སོས་རང་རང་གི་སྔོན་བྱུང་ལོ་རྒྱུས་གཞིར་བཟུང་ནས་ཕྱག་མཆོད་བསྐོར་བ་བྱ་སྲོལ་ཞིག་ཆགས་ཡོད་དེ། དེ་སྔོན་རྒྱ་གར་གྱི་མུ་སྟེགས་ཆོས་ལུགས་པའི་ནང་གསེས་དབང་ཕྱུག་པ་དང་གཅེར་བུ་པ་སོགས་ལྷ་དབང་ཕྱུག་ལ་སྐྱབས་གནས་སུ་འཛིན་པ་རྣམས་ཀྱིས་གངས་ཏེ་སེ་འདི་ནི་ལྷ་ཆེན་དབང་ཕྱུག་ཆེན་པོའི་བཞུགས་གནས་ཡིན་པར་ངོས་འཛིན་བྱེད་ཀྱི་ཡོད་པ་དང༌། དབང་ཕྱུག་པའི་སྲོལ་ལུགས་འདི་ཡང་དེ་ནས་བྱུང་བ་ཡིན་ཞེས་གནས་ཐུན་མོང་མ་ཡིན་པ་ཞིག་ཏུའང་ངོས་འཛིན་པ་དང༌། གངས་ཏེ་སེ་དང་འབྲེལ་ཡོད་མཚོ་མ་ཕམ་ཡང་ཤིན་ཏུ་བྱིན་ཅན་གྱི་མཚོ་ཞིག་ཏུ་ངོས་འཛིན་ཞིང༌། མཚོ་དེའི་ཁ་འབབ་ཀྱི་ཆུ་བོ་ཆེན་པོར་རྒྱ་གར་ཡུལ་དུ་སླེབས་པའི་ཚེ། རྒྱ་གར་བ་རྣམས་ཀྱིས་ཆུ་བོ་དེར་ཁྲུས་བྱས་ཏེ་གནས་མཆོག་གངས་ཏེ་སེ་དང་མཚོ་མ་ཕམ་གྱི་བྱིན་རླབས་ཀྱིས་ཆུ་བོ་དེ་དག་ཏུ་སུ་ཞིག་གིས་ཁྲུས་བྱས་པ་ལ་སྒྲིབ་པ་རྣམས་འདག་ཐུབ་པའི་ཡིད་ཆེས་བྱེད་སྲོལ་ཡོད་པ་དང༌། རྒྱ་གར་བ་བརྒྱ་ཕྲག་མང་པོ་ལོ་རེར་གངས་ཏེ་སེ་དང་མཚོ་མ་ཕམ་ལ་མཇལ་བསྐོར་དུ་འགྲོ་བཞིན་པའི་དངོས་ཀྱི་གནས་ཚུལ་ལ་བལྟས་ན། རྒྱ་གར་གྱི་དབང་ཕྱུག་པའི་ལུགས་དེ་བོན་ཀྱི་གནའ་བོའི་ཤིས་རིག་ཞང་ཞུང་ནས་ཕར་དར་བ་ཞིག་ཡིན་པར་འདོད། དེ་ཡང་སུམ་པ་ཡེ་ཤེས་དཔལ་འབྱོར་གྱིས་མཛད་པའི《ཆོས་འབྱུང་དཔག་བསམ་ལྗོན་བཟང》ལས། མ་གདྷཱུ་བྱང་ཕྱོགས་རི་བརྒྱུད་ནག་པོ་དགུའི་ཕ་རོལ་ན་དབང་ཕྱུག་ཆེན་པོར་གནས་པའི་གངས་ཆེན་ཏེ་སེ་དང་སྤོས་ངད་ལྡང་གི་བར་དུ་ཀླུ་མ་དྲོས་པའི་གནས་མདོ་སྡུག་པ་སོགས་ལས་ཀྱང་བསྔགས་པའི་མཚོ་མ་དྲོས་པ་མཆུ་ཞེང་གཉིས་ཀ་དཔག་ཚད་ལྔ་བཅུ་རེ་ཡོད་པའི་ཤར་སོགས་ཕྱོགས་བཞིར་བྲག་གླིང་ཆེན་ཁྱུ་མཆོག་རྟ་སེང་གེའི་ཁ་འདྲ་བ་ནས་བྱུང་བའི་ཆུ་བོ་གང་གཱ་དང༌། སིན་དྷུ། པཀྶི། སི་ཏཱ་བཞིས་དངུལ་གསེར་བཻཌཱུརྱ་རྡོ་རྗེའི་ཕྱེ་མ་འདྲེན་ཅིང་ཆུ་ཕྲན་ལྔ་བརྒྱ་རེ་ཁྱེར་ནས་མ་དྲོས་པ་ལ་གཡས་བསྐོར་དུ་ལན་བདུན་རེ་བསྐོར་ནས་རང་རང་ཕྱོགས་ཀྱི་རྒྱ་མཚོར་འབབ་པ།ཞེས་གསུངས།

༢ འཛམ་བུ་གླིང་ཞེས་པའི་མིང་གི་བྱུང་ཚུལ།

                   《བསྟན་འགྱུར་དཀར་ཆགས》ལས། མཚོ་མ་དྲོས་པའི་འགྲན་ངོགས་སུ་ཤིང་ཛམ་བུ་ཏྲི་ཤ་ཞེས་བྱ་བ་འབྲས་བུ་རོ་མཆོག་མངར་པོ་ལྡན་པར་སྐྱེས་པ། ཤིང་དེའི་འབྲས་བུ་ཤིན་ཏུ་སྨིན་པར་གྱུར་པ་ཆུའི་ནང་དུ་ལྷུང་བ་ལས་ཛམ་བུ་ཞེས་བྱ་བའི་སྒྲ་ཡང་འབྱུང་ངོ་།། དེར་ལྷུང་བའི་འབྲས་བུ་དེ་ལས་ཀླུའི་རྒྱལ་པོ་རྣམས་ཉར་སྤྲུལ་ནས་ཟ་བར་བྱེད་ཅིང༌། མ་ཟོས་པ་རྣམས་ནི་ཆུ་དང་ཕྲད་པའི་སྟོབས་ཀྱིས་ཛམ་བུ་ཆུ་བོའི་གསེར་དུ་འགྱུར་བ་ཞིག་ཡོད་དོ།།

                      དེས་ན་ཤིང་དེས་ཉེ་བར་མཚོན་པའི་གླིང་ཡིན་པས་འཛམ་བུ་གླིང་ཞེས་ཐ་སྙད་དུ་བྱས་སོ་ཞེས་འཛམ་བུ་གླིང་ཞེས་པའི་མིང་གི་ཐ་སྙད་བྱུང་ཚུལ་སོགས་གསལ་བོར་བསྟན་ཡོད་པ་མ་ཟད། བོན་གྱི་ཡིག་རྙིང《ཀུན་འདུས》ལས། འཛམ་བུའི་གླིང་ཞེས་པའི་མིང་ཚིག་སྒྲ་བཤད་ལ། རྒྱ་གར་འཕགས་པའི་ཡུལ་དབུས་ནས་བྱང་དུ་རི་ནག་དགུ་འདས་པ་ན། ཞང་ཞུང་ཡུལ་གྱི་ལྟེ་བའི་གནས་མཆོག་གངས་ཏེ་སེ་དང༌། སྤོས་ངད་ལྡན་པ་ལྡིང་བོན་རི་དང༌། དང་ར་རྟ་སྒོ་རི་སོགས་ཀྱི་བར་དུ། མ་པང་གཡུ་མཚོ་གནས་ཤིང་འཁྱིལ་ཡོད། མཚོ་དེ་ནི་འཛམ་བུའི་གླིང་གི་ལྟེ་འབུར་གྱུར་བས། ཆུ་ཐམས་ཅད་ཀྱི་རྩ་བའི་འབྱུང་ཁུངས། ཁ་འབབ་བཞིའི་འབྱུང་གནས་ཡིན་ཞེས་བསྟན་ཡོད་པས། གནས་ཡུལ་འདིར་འཛམ་གླིང་སྤྱི་ཡི་ཆགས་སྲིད་དང་འབྲེལ་བ་ཡོད་པ་མ་ཟད། འཛམ་བུའི་གླིང་ཞེས་པའི་མིང་དེའང་ཐོག་མར་ཞང་ཞུང་གི་རི་མཚོ་ཤིང་གསུམ་ལ་བརྟེན་ནས་བཏགས་པ་ཡིན་པར་སེམས།ཁྱད་པར་འཛམ་བུའི་གླིང་གི་བྱེ་བྲག་བསྟན་པ་ནི། 《ཀློང་ཆེན་ཆོས་འབྱུང》ལས། གླིང་གཞན་དུ་སངས་ས་མི་འབྱོན་ལ། གླིང་འདིར་སྤྲུལ་སྐུའི་འབྱོན་གནས་ཡིན་པས། གླིང་གཞན་པས་མཆོག་ཏུ་གྱུར་པའི་འཛམ་བུའི་གླིང་མཆོག་འདི་ན། གླིང་གཞན་ན་མེད་པའི་ངོ་མཚར་བསྒྲག་ཏུ་རུང་བ་དུ་མ་ཡོད་དེ། དུས་གསུམ་གྱི་སངས་རྒྱས་མངོན་པར་རྫོགས་པར་འཚང་རྒྱ་བའི་གནས་དང༌། ཆོས་ཀྱི་འཁོར་ལོ་བསྐོར་བའི་གནས་བྱིན་རླབས་ཅན་ཞེས་བཤད་ཡོད་ལ། འདིར་ས་ཆེན་བསོད་ནམས་རྒྱལ་མཚན་གྱི《རྒྱལ་རབས་གསལ་བའི་མེ་ལུང》ལས། བོད་ཅེས་བྱ་བ་ཁྱད་དུ་འཕགས་པའི་ཡུལ།། རི་མཐོ་ས་གཙང་གངས་རི་གཉན་གྱི་མགུལ། །བསིལ་ལ་མཛེས་པ་ལྷ་གནས་གཞལ་ཡས་ཁང༌། །ངོ་མཚར་རྨད་བྱུང་ཕན་བདེ་འབྱུང་བའི་གཞི།། ཆུ་བོ་བཞི་འབབ་རྩི་ཤིང་ནགས་ཀྱིས་མཛེས། །འབྲི་སྣ་ལྔ་འཁྲུངས་རིན་ཆེན་སྣ་ཚོགས་འབྱུང་།། རྐང་བཞི་ཀུན་ཁྱད་རྩི་ཐོག་མར་ལ་སྤྱོད། ཅེས་གསུངས་པ་དང་ཡོངས་སུ་མཐུན་པའོ། །           

༣ སྟག་གཟིག་འོལ་མོ་ལུང་རིངས།       

                  ཕྱིས་བྱུང་གི་ལོ་རྒྱུས་སྨྲ་བ་རྣམས་ཀྱིས་གཤེན་ཡུལ་འོལ་མོ་ལུང་རིངས་ཞེས་པ་དེ་སྟག་གཟིག་གམ་སྟག་གཟིག་འོལ་མོ་ལུང་རིངས་ཞེས་ཐ་སྙད་མི་འདྲ་བ་གཉིས་སྦྱར་ཡོད་དེ། མཁས་པ་འགས་འདི་གཉིས་དོན་མཚུངས་ཡིན་པ་བཞེད་ནའང༌། འོལ་མོ་ལུང་རིངས་དང་སྟག་གཟིག(ད་ལྟའི་ཏ་ཟི་རྒྱལ་ཁབ)གཉིས་ལ་འབྲེལ་དེ་འདྲ་མེད་པར་འདོད་དེ། རྒྱུ་མཚན་ནི་ཏ་ཟིའི་ཡུལ་ན་གངས་ཏེ་སེ་དང༌། ཆུ་བོ་ཆེན་པོ་བཞིའི་མགོ་བོ། མཚོ་མ་ཕམ་རྣམས་མེད་པ་མངོན་སུམ་ཚད་མས་གྲུབ་པ་དེ་ལས་ལྷག་པའི་ཤེས་བྱེད་ཅི་ཞིག་ཀྱང་མི་དགོས་སོ།།

                  དེ་ཡང་ཕྱིས་འབྱུང་གི་མཁས་བ་རྣམས་ཀྱིས་སྟག་གཟིག་འོལ་མོ་ལུང་རིངས་ཞེས་པའི་སྟག་གཟིག་གི་སྒྲ་དོན་ནི། 《ལེགས་བཤད་མཛོད》ལས། ཞིང་ཁམས་འདིའི་མཐར་གངས་དབལ་སོ་ཅན་གྱི་ར་བས་བསྐོར་བ་དེ་ལ་སྟོན་པ་གཙོ་འཁོར་ལྔ་བོད་དུ་བྱོན་དུས་སྟོན་པས་མདའ་ལམ་དྲངས་པའི་ཤུལ་འདོམ་གང་ཙམ་གྱི་སྒོ་གཅིག་ཡོད་པའི་རིའི་ཁོང་གསེང་ན་སྟག་གཟིག་ལ་སོགས་གཅན་འཕྲང་དང༌།མུན་འཕྲང་ཉིན་ལམ་དགུ་དགུས་ཆོད་པ་ཡོད་པའི་སྒྲ་ཞུགས་པ་སྟེ། བོད་འདི་གངས་རིའི་ཕྲེང་བས་བསྐོར་བ་ལ་གངས་ཅན་བོད་ཟེར་བ་ལྟ་བུའོ།། ཞེས་བོད་ལ་གངས་རིའི་ཕྲེང་བས་བསྐོར་བས་གངས་ཅན་བོད་ཟེར་བ་བཞིན་དུ་གཤེན་ཡུལ་འོལ་མོ་ལོང་རིང་ན་གཅན་གཟན་སྟག་གཟིག་སོགས་མང་པོ་ཡོད་པས་སྟག་གཟིག་འོལ་མོ་ལུང་རིངས་ཞེས་མིང་ཐོབ་པ་ཞིག་ཡིན་པ་བསྟན་འདུག་ནའང་བོན་གཞུང་ཁག་རེ་ལ་སྟ་གཟིག་འོལ་མོ་ལུང་རིངས་ཞེས་གོང་གི་སྒྲ་དོན་གྱིས་འབྲེལ་མི་ཐུབ་པའི་སྒྲ་ཞིག་འཐོན་འདུག་པ་དང༌། རྒྱས་པ་མདོ་དྲི་མེད་གཟི་བརྗོད་དང༌། བསྡུས་པ་མདོ་བསྡུས། མདོ་གཟེར་མིག་སོགས་ལས་གསལ་བ་ལྟར། སྟོན་པས་གཟིགས་ཚད་ལྔ་དང། དགོངས་ཚད་ལྔ་སོ་སོར་བསྟན་ཚུལ་བཤད་ཡོད་དེ། དང་པོ་ཡུལ་ལ་གཟིགས་པ་བདེ་ཆེན་སྟག་གཟིག་སྒྲོལ་མ་འོལ་མོ་ལུང་རིངས་ནི་ཚངས་རྒྱུང་ཉེར་ལྔ་བརྩེགས་པའི་དབུ་མ།རྡུལ་མེད་རྡུལ་དང་བྲལ་བའི་ཞིང་ཁམས། ལྷོ་འཛམ་བུའི་གླིང་གི་མིག གནས་མཆོག་འོལ་མོ་ལུང་རིངས་ཏེ། ཞེས་ས་ཚིགས་ཀྱི་དབུས་གངས་ཏེ་སེར་འཛིན་པའི་དེའི་བྱང་ནུབ་ལ་གཤེན་ཡུལ་འོལ་མོ་ལུང་རིངས་ཞེས་པ་སངས་རྒྱས་རྣམས་ཀྱིས་དུས་རྟག་ཏུ་གཟིགས་པའི་གནས་མཆོག་དག་ཞིང་བྱང་ཕྱོགས་ཤམ་བྷ་ལ་དང་དོན་གཅིག་མིང་གི་རྣམ་གྲངས་ཞེས་སངས་རྒྱས་རྣམས་ཀྱིས་དུས་རྟག་ཏུ་གཟིགས་པས་ན་སྟག་གཟིག་འོལ་མོ་ལུང་རིངས་ཞེས་བསྟན་པ་དང༌། ཡང་སྐྱབས་སྟོན་ཁྲོ་འགྲེལ། གླེང་བཞི་བསྟན་པའི་འབྱུང་ཁུངས། དར་རྒྱས་གསལ་སྒྲོན་སོགས་ཕྱིས་འབྱུང་གི་མཁས་པ་རྣམས་ཀྱིས་མཛད་པའི་བསྟན་འབྱུང་སོ་སོ་ལ་ཁྱད་པར་སྣ་ཚོགས་སུ་གསལ་བའི་དག་ཞིང་གི་ཡུལ་ངོས་འཛིན་ཚུལ་ནི། གང་ཟག་སོ་སོའི་དག་པའི་སྣང་ངོར་དག་ཞིང་མོས་པའི་ཡིད་ཡུལ་དུ་གྱུར་བ་ཞིག་སྟེ། ཞིང་ཁམས་དང་འཁོར་ཞིང་ཐུན་མོང་བ་འཛམ་གླིང་གི་གནས་ཐམས་ཅད་ལས་ཁྱད་དུ་འཕགས་པའི་ཡུལ།དུས་གསུམ་སངས་རྒྱས་ཐམས་ཅད་བྱོན་པའི་གནས་ཤམ་བྷ་ལ་ཡི་ཞིང་ཁམས་སམ། ངེས་ཚིག་དུས་རྟག་ཏུ་འགྲོ་དོན་སྐྱོ་ངལ་མེད་པར་གཟིགས་པ་དང་ཐུགས་རྗེ་རྒྱུན་ཐག་འལ་འོལ་མེད་པར་རིང་ཞིང་བཀའ་ལུང་སྟོན་པའི་གནས་ཡིན་པས་ན།སྟག་གཟིག་འོལ་མོ་ལུང་རིངས་ཀྱི་ཞིང་ཁམས་ཞེས་གྲགས་པ་ནི་འདིའི་མིང་ཚིག་སྒྲ་བཤད་ངེས་ཚུལ་ལོ།། ཞེས་སྟག་གཟིག་འོལ་མོ་ལུང་རིངས་ཀྱི་སྒྲ་དོན་ཡང་ཇེ་གསལ་དུ་བསྟན་ཡོད། དེས་ན་རང་གིས་སྟག་གཟིག་འོལ་མོ་ལུང་རིངས་དང་སྟག་གཟིག་འོལ་མོ་ལུང་རིངས་གཉིས་མཐའ་གཅིག་དུ་ངེས་པའི་རྒྱུ་མཚན་ད་དུང་མ་རྟོགས་པས་བཤད་པ་འདི་ཙམ་དུ་ལུས་སོ།།         

                  དེ་ཡང་ཞིང་ཁམས་ཀྱི་ཁྱད་པར་དུ་བྱས་པའི་གནས་མཆོག་དེ་ནི།《མདོ་སྐྱེ་སྒོ་བཅོད་པ》ལས། འོལ་མོ་ལུང་རིངས་གནས་སུ་སྐྱེ་བར་ཤོག།ལུས་ངན་འཁོར་བའི་ལུས་སུ་མི་སྐྱེ་ཞིང༌། །ཞེས་འཁོར་ཞིང་ལས་ཁྱད་དུ་འཕགས་པ་སྨོན་གནས་ཀྱི་ཞིང་ཁམས་ཤིག་ཡིན་པར་བསྟན་ཡོད་པས། འོལ་མོ་ལུང་རིངས་ཞེས་བྱ་བ་དེ་ནི་དངོས་གནས་ཞང་ཞུང་ལ་ཕན་བདེའི་ལེགས་ཚོགས་ཐམས་ཅད་འབྱུང་བའི་གནས་ཐུན་མོང་མ་ཡིན་པ་ཞིག་ཡིན་དགོས་པར་བཀའ་མདོ་རྒྱུད་ཀུན་ལས་བཞེད་ཡོད། དེ་ལྟར་གནས་ཡུལ་འདིར་མི་རྣམས་ཀྱི་དད་མོས་ཀྱི་ཡུལ་དུ་གྱུར་པའི་ཞིང་ཁམས་ལ་སོང་ཡོད་པས། ཞིང་ཁམས་དེ་ལའང་མཚན་གྱི་རྣམ་གྲངས་ཀྱང་དུ་མ་ཡོད་དེ། གཡུང་དྲུང་གསལ་བ་འོད་ཀྱི་ཞིང་ཁམས་དང༌། སྟག་གཟིག་འོལ་མོ་ལུང་རིངས་ཀྱི་ཞིང་ཁམས། བྱང་ཤམ་བྷ་ལྷ་ཡི་ཞིང་ཁམས་སོགས་བརྗོད་པས། གང་ལྟར་ཞིང་ཁམས་དང་འཁོར་ཞིང་ཐུན་མོང་དུ་གྱུར་པ་དང་རིན་འཛིན་དཔོན་གསེས་འདུ་གནས་ཁྱད་འཕགས་ཤིག་ཡིན་དགོས་སོ།།

དཔྱད་གཞིའི་ཡིག་ཆ།

1  མཚོ་སྔོན་པོ་དྲ་བ།   

2  དུང་དཀར་བློ་བཟང་འཕྲིན་ལས་ཀྱིས་བརྩམས་པའི་《དུང་དཀར་ཚིག་མཛོད་ཆེན་མོ》

3  དོན་གྲུབ་ལྷ་རྒྱལ་སོགས་ཀྱིས་སྒྲིག་པའི་《བོན་གྱི་ཤེས་རིག་ཚིག་མཛོད》

རྩོམ་སྒྲིག་པ། ཚེ་པེ།  གཡུ་འཛོམས།