སྤང་ཐོག་དགོན་པ།

རྩོམ་པ་པོ།   རྩམ་སྐྱེས།དུས་ཚོད།   2018-06-19   རྩོམ་ཁུངས།    རྔ་བའི་གསར་འགྱུར་དྲ་བ།

འཛམ་ཐང་གི་སྤང་ཐོག་དགོན་པའི་རྡོ་བརྐོས་དང་མཆོད་རྟེན།

                   རྡོ་བརྐོས་ནི་བོད་ལ་མཚོན་ན་སྔོན་ཆད་ནས་དར་ཆ་ཆེ་བའི་ལག་ཤེས་བཟོ་ལས་དང་རིག་གནས་རྒྱུད་འཛིན་གྱི་ཐབས་ལམ་མཆོག་ཏུ་གྱུར་བ་ཞིག་ཡིན་ལ། བོད་ཀྱི་ས་ཆ་སོ་སོར་རྡོ་བརྐོས་ཀྱིས་བཞེངས་པའི་མ་ཎི་རྡོ་འབུམ་གང་སར་རིག་ཐུབ། སྤྱིར་བཏང་རྡོ་བརྐོས་ཀྱི་ནང་དོན་ནི་གཙོ་བོ་བན་བོན་གྱི་བསྟན་བཅོས་དང་གཟུངས་སྔགས། ལྷ་སྐུ་དང་སྐྱེས་ཆེན་དམ་པའི་འདྲ་སྐུ་སོགས་ཡིན་ལ། སྤྱི་ཚོགས་དང་རིག་གནས་འཕེལ་རྒྱས་ཀྱི་བརྒྱུད་རིམ་ཁྲོད། རྡོ་བརྐོས་ལག་རྩལ་ལ་བརྟེན་ཏེ་བོད་ཀྱི་ཆོས་དང་རིག་གནས་སྣ་ཚོགས་ཉར་ཚགས་དང་རྒྱུད་འཛིན་གྱི་འཕྲིན་ལས་ལེགས་པར་བསྐྱངས་དང་སྐྱོང་བཞིན་ཡོད། 

                  འཛམ་ཐང་གི་སྤང་ཐོག་དགོན་པ་ནི་རྔ་བ་ཁུལ་འཛམ་ཐང་རྫོང་གི་རྫོང་མདའ་ཡུལ་ཚོའི་མངའ་ཁོངས་སུ་གཏོགས་ཤིང་། རྫོང་མཁར་དེ་དང་བར་ཐག་སྤྱི་ལེ༣༢ཡི་མཚམས་སུ་མཆིས། དགོན་པ་དེ་ནི་ཡོན་རྒྱལ་རབས་སྐབས་སུ་བཏབ་པ་ཡིན་ལ། བོད་བརྒྱུད་ནང་བསྟན་གྱི་གྲུབ་མཐའ་ལས་རྙིང་མ་བའི་གྲུབ་མཐའ་འཛིན་པའི་དགོན་པ་ཞིག་ཡིན། དགོན་པ་དེའི་སྤྱིའི་ས་ཁྱོན་ལ་སྤྱི་ཆིང༡.༠༢༣ཡོད་ཅིང་། དགོན་པའི་བཟོ་བཀོད་ཀྱི་ས་ཁྱོན་ལ་སྨི་གྲུ་བཞི་མ༡༥༣༨ཡོད། དེར་སྔོན་ཆད་ནས་རྡོ་བརྐོས་ལག་རྩལ་གྱི་སྲོལ་རྒྱུན་བཟང་བོ་འཛོམས་ཡོད་པར་མ་ཟད། སྲོལ་རྒྱུན་བཟང་བོ་དེ་ལ་བརྟེན་ཏེ། བཀའ་འགྱུར་དང་བསྟན་འགྱུར་གཉིས་ཀྱི་རྡོ་བརྐོས་སྒྱུ་རྩལ་རི་རབ་བཞིན་བརྩེགས་པ་ད་ལྟའི་མཐོང་ཆོས་སུ་གྲུབ་ཡོད། དེར་བརྟེན་རྡོ་བརྐོས་དང་མཆོད་རྟེན་ནི་དགོན་པ་དེའི་ནང་བསྟན་རིག་གནས་ཀྱི་ཁྱད་ཆོས་གཙོ་བོ་གཉིས་སུ་གྱུར།

               དེ་ཡང་ཐོག་མར་སྤང་ཐོག་དགོན་པའི་རྡོ་བརྐོས་སྒྱུ་རྩལ་གྱི་སྐོར་ལ་གཟིགས་ན། ལོ་རྒྱུས་ལྟར་ན་དགོན་པ་དེས་མིང་ཀྲི་ཁྲི་ལོ་ནས་མགོ་བཟུང་སྟེ། རྡོ་བཟོ་བ༦༠ལྷག་གདན་འདྲེན་བྱས་ཏེ་བགྲང་བྱ༩ཡི་རིང་ལ་དཀའ་སྤྱད་འབད་བརྩོན་གནང་བ་བརྒྱུད། ཕལ་ཆེར་རྡོ་ལེབ་ཁྲི༥༠ལྷག་གི་ངོས་གཉིས་སུ་ནང་བའི་བཀའ་བསྟན་ཟུང་གི་བསྟན་བཅོས་ལེགས་པར་བརྐོས་ཏེ་རྡོ་འབུམ་གྱི་རི་རབ་བཞེངས་ཤིང་། ད་ལྟ་རྡོ་འབུམ་དེའི་མཐོ་ཚད་ལ་སྨི༩.༧དང་རིང་ཚད་ལ་སྨི༤༦དང་། ཞེང་ཚད་ལ་སྨི༡༣བཅས་ཡོད་ཅིང་། ས་ཁྱོན་ལ་སྨི་གྲུ་བཞི་མ༥༩༨ཡོད་པས། རྒྱལ་ཁབ་ཕྱི་ནང་ཀུན་ལ་མཚོན་ན་འདི་འདྲའི་རྡོ་བརྐོས་རིག་དངོས་དང་བོད་རིག་པའི་བསྟན་བཅོས་ཀྱི་རྒྱུ་ཆ་ཤིན་ཏུ་དཀོན་ཞིང་། འདི་ནི་བོད་ཁུལ་གྱི་ཆེས་འཐུས་སྒོ་ཚང་བའི་བཀའ་བསྟན་གྱི་རྡོ་བརྐོས་ཤིག་ཡིན་པར་མ་ཟད། རྒྱལ་ཡོངས་ནས་རྡོ་ལེབ་ཀྱི་གྲངས་འབོར་མང་ཤོས་ཟིན་པའི་བཀའ་བསྟན་གྱི་རྡོ་འབུམ་ཡང་ཡིན་པས། དགོན་པ་དེས་དུས་ད་ལྟའང་རྡོ་བརྐོས་ལག་རྩལ་གྱི་སྲོལ་རྒྱུན་བཟང་བོ་རྒྱུད་འཛིན་གྱིས་དར་སྤེལ་བཏང་དང་གཏོང་བཞིན་ཡོད།

                   གཞན་ཡང་སྤང་ཐོག་དགོན་པའི་ཁྱད་ཆོས་གཞན་ཞིག་སྟེ། དགོན་པ་དེར་བསྡོམས་པའི་མཆོད་རྟེན༣༢ཡོད་ཅིང་། ལོ་རྒྱུས་ལས་དེ་དག་བྱེ་བྲག་ཏུ་མིང་རྒྱལ་རབས་དང་ཆིང་རྒྱལ་རབས། མིན་གོའི་དུས་སྐབས་བཅས་སུ་བསྟུད་མར་བཞེངས་པ་ཡིན་ཟེར། མཆོད་རྟེན་དག་དགོན་པའི་དཀྱིལ་དབུས་ནས་རིང་ཚད་སྨི༤༦༥དང་ཞེང་ཚད་སྨི༢༥ཡི་ཁྱབ་ཁོངས་སུ་འགྱིང་ངེར་འགྲེང་ཞིང་། ལོ་རྒྱུས་ཐོག་དགོན་པ་འདི་ཉིད་བོད་ཁུལ་གྱི་མཆོད་རྟེན་གླིང་ཆེན་པོ་གསུམ་གྱི་གྲས་སུ་གཏོགས། དགོན་པ་འདིའི་མཆོད་རྟེན་ཚང་མ་རྒྱ་གར་གྱི་ལུགས་ལྟར་བཞེངས་ཤིང་། མཆོད་རྟེན་གྱི་ཁོག་སྟོང་བར་བཞེངས་ཏེ་དེར་ཕྱག་སྟོང་སྤྱན་སྟོང་དང་སྟོན་པ། ཚེ་དཔག་མེད། ཨོ་རྒྱན་རིན་པོ་ཆེ། སྒྲོལ་ལྗང་སོགས་སྐུ་འདྲ་དང་ལྡེབས་རིས་སྣ་ཚོགས་ལེགས་པར་བཞེངས་ཡོད་པར་ཟད། མཆོད་རྟེན་ཆེ་ཆུང་སྣ་ཚོགས་སུ་མཆིས། དེ་ལས་བདུད་འདུལ་མཆོད་རྟེན་ནི་སྤྱི་ལོ༡༤༢༧ལོར་བཞེངས་ཤིང་། མཆོད་རྟེན་དེའི་མཐའི་རིང་ཚད་ལ་སྨི༩.༢༥དང་མཐོ་ཚད་ལ་སྨི༣༢ཡོད་ཅིང་། དེར་མིང་རྒྱབ་རབས་ཀྱི་སྐུ་འདྲ་དང་ལྡེབས་རིས་ཁག་གཅིག་རྟེན་ཏུ་བཞེངས་ཤིང་། འདི་ནི་སྤང་ཐོག་དགོན་པའི་མཆོད་རྟེན་ཀུན་ལས་ལོ་རྒྱུས་རིང་ཤོས་དེ་ཡིན། དེ་ཡང་མཆོད་རྟེན་འགའ་ཞིག་ལའང་བགྲང་བྱ་ཉིས་བརྒྱ་ལྷག་གི་ལོ་རྒྱུས་ལྡན། དུས་ཀྱི་འགྱུར་བག་ཇི་འདྲའི་རྒོད་ཅིང་མཆོད་རྟེན་དེ་དག་དུས་ད་ལྟའང་དགོན་པའི་དཀྱིལ་ནས་རི་རབ་བཞིན་འགྲེང་ཡོད་པས། 

              གོང་གསལ་ལས་སྤང་ཐོག་དགོན་པའི་རྡོ་བརྐོས་དང་མཆོད་རྟེན་གང་ཡིན་རུང་། ལོ་རྒྱུས་ཀྱི་ཡུན་རིང་ཞིང་གཞི་ཁྱོན་རྒྱ་ཆེ་ལ་རྣམ་གྲངས་ཕུན་སུམ་ཚོགས་ཤིང་། མི་རིགས་ཀྱི་ཁྱད་ཆོས་མངོན་པར་གསལ་ཞིང་སྒྱུ་རྩལ་དང་བཟོ་བཀོད་ཀྱི་རིན་ཐང་བླ་ན་མེད་པས། དེས་བོད་ཀྱི་ནང་བསྟན་རིག་གནས་སྤྱི་དང་ལྷག་པར་རྙིང་མ་བའི་གྲུབ་མཐའ་འཕེལ་ཞིང་རྒྱུད་འཛིན་དར་སྤེལ་ཡོང་བར་མཛད་རྗེས་རླབས་ཆེན་བཞག་པར་མ་ཟད། དུས་ད་ལྟའང་བོད་ཀྱི་རིག་དངོས་དང་བཟོ་བཀོད་སྒྱུ་རྩལ་ཞིབ་འཇུག་གི་རིན་ཐང་བླ་ན་མེད་པར་ལྡན་ནོ།།

 རྩོམ་སྒྲིག་པ།  ཚེ་པེ།  གཡུ་འཛོམས།