སྨན་དབང་པོ་ལག་པའི་ཕན་ནུས།

རྩོམ་པ་པོ།   དུས་ཚོད།   2017-11-30   རྩོམ་ཁུངས།    རྔ་བའི་གསར་འགྱུར་དྲ་བ།

       དབང་པོ་ལག་པས་ལུས་སྟོབས་ཁུ་བ་སྐྱེད།། ཅེས་པར། རང་བྱུང་པས། དབང་པོ་ལག་པས་དྭངས་མ་སྐྱེད།། ཅེས་པར་མིང༌། ཨིནྡྲ་ནིཔཱ་ཎི། ཨིནྡྲ་ནིཀ་ར། ཨིནྡྲ་ནིཧ་སྟ། དབང་པོ་ལག་པ། བ་ལ་ཝདྷ། སྟོབས་སྐྱེད། བརྒྱ་བྱིན། ཧབ་ཤང་ཚེའུ་ཟེར། འདི་ལ་རིགས་ཆེན་གཉིས་ཏེ། དབང་པོ་ལག་པ་དང་བྱེ་ལྕེ་ལག་པའོ།། ལོ་རྒྱུས་མདོར་བསྡུས་ནི། སྔོན་ཚེ་བརྒྱ་བྱིན་གྱི་བུ་དབང་པོ་སྟོབས་ལྡན་གྱི་ལག་པར་གནོད་སྦྱིན་སྦྲུལ་མགོ་ཅན་གྱི་བུ་བྱེ་ལྕེ་བྱ་བས་མདའ་བརྒྱབ་ནས་བཅད་པ་དང༌། དབང་པོས་གྲིས་བྱེ་ལྕེའི་ལག་པར་བརྒྱབ་ནས་བཅད་པའི་ཚེ། དབང་པོའི་ལག་པར་རལ་གྲི་འཆང་བཞིན་སར་ཆད་པར་སྨོན་ལམ་བཏབ་པས་བཅུད་ལྡན་དབང་ལག་ཅེས་ལག་པས་འོག་རྩ་བར་སྐྱེས་ལ་རལ་གྲི་ས་སྟེང་དུ་ལོ་མར་ཕྱུར་བ་དང༌། བྱེ་ལྕེའི་ལག་ཏུ་མདའ་འཆང་བ་སྔ་མ་བཞིན་ལག་པ་སོར་མོ་རྣམས་གྲིས་བྲེགས་ཤུལ་སྐྱེས་ལ་མདའ་ས་སྟེང་དུ་ལོ་སྡོང་དབྱིབས་བཅས་སྐྱེས་པར་བཤད། འདི་དག་གི་ཁུངས་དང་དབྱེ་བ་ངོས་འཛིན་སྦྱོར་བ་སོགས་རྒྱས་པ་དབང་པོ་ལག་པའི་རྒྱུད་དང་མན་ངག་གི་སྙིང་པོ་ཕྱོགས་གཅིག་ཏུ་བསྡུས་པ་ཁོ་བོས་ལོགས་སུ་བྱས་པར་གསལ། མདོ་ཙམ་སྔོ་འབུམ་དུ། དབང་ལག་ཉིན་སྲིབ་སྐམ་གཤེར་སྐྱེ།། ལྡུམ་བུ་མི་རྒོད་ལག་པ་འདྲ།། ལོ་མ་རལ་གྲིའི་འཁོར་ལོ་ཅན།། སྡོང་པོ་ལྷ་ཡི་མཆོད་སྡོང་ལ།། མེ་ཏོག་དངུལ་གྱི་པ་ཏྲ་ཅན།། སྐམ་སྐྱེས་དཀར་ལ་རླན་སྐྱེས་དམར།། རྩ་བ་མི་ཡི་ལག་པ་དེ།། གསར་རྙིང་ཐལ་མོ་སྦྱར་ནས་སྐྱེ།། རོ་ནི་མངར་སྣུམ་བཅུད་དང་ལྡན།། ནུས་པས་ཁུ་བ་དབང་སྟོབས་སྐྱེད།། ཅེས་བཞིན་ལས། རྩ་བ་མཛུབ་མོ་ལྔ་པ་རང་བཟང་ཞིང༌།། དེ་ལས་ཉུང་རིམ་གྱིས་དམན་པ།། རྩ་ལོ་འདྲ་ལ་མེ་ཏོག་སྤང་ལས་སྐྱེས་པ་དཀར།། ན་ལས་སྐྱེས་པ་དམར། དྲི་མ་ཙན་དན་དམར་པོའི་དྲི་དང་ལྡན་པ་ཡིན།། འདི་དུག་ཕྱུང་བ་དྲོད་དུ་དབབ་པ། བཅུད་དུ་དགུག་པ་རྣམས་བཅུད་ལེན་དུ་གཏོང་ན་དགོས། གཞན་གཏོང་ཡུལ་དང་བསྟུན་པར་བྱ། བྱེ་ལྕེ་ལག་པ་ནི། ལོ་སྡོང་ཆུང་ལ་སྡོང་པོ་མདའི་དབྱིབས་ཅན་རྩ་བ་སོར་མོ་མེད་པའི་ལག་པའམ་སོར་མོ་གཅིག་གཉིས་ཡོད་པའང་འབྱུང༌། ནུས་པ་སྔ་མ་ལས་དམན་པ་ཡིན།།