སྨན་རུ་རྟའི་ཕན་ནུས།

རྩོམ་པ་པོ།   དུས་ཚོད།   2017-11-30   རྩོམ་ཁུངས།    རྔ་བའི་གསར་འགྱུར་དྲ་བ།

        རུ་རྟས་རླུང་ཁྲག་ཕོ་བ་སྦོས་པ་སེལ།། གློ་ནད་གག་པ་ཤ་རོ་གཅོད་པར་བྱེད།། ཅེས་པར། ལྕགས་ཕྲེང་ལས། རུ་རྟ་ནུས་པ་གཉིས་ལྡན་ཏེ།། མ་རུལ་སྨྱོ་ཡང་ནུས་པ་ཡིན།། ཞེས་དང༌། རུ་རྟ་རྣོ་དྲོ་སྐྲན་དང་བད་ཀན་བཤིག སེར་བླ་འཁྱིལ་བ་འབྱིན་པར་བྱེད།། ཅེས་དང༌། རང་བྱུང་པས། མ་ནུ་རུ་རྟ་འདུ་བ་སྙོམས།། ཞེས་དང༌། རུ་རྟ་དཀར་དང་ནག་པོ་གཉིས།། ཚད་འཁྲུགས་གཉན་ནད་སྲོག་རླུང་འཇོམས།། ཞེས་གསུངས་སོ།། རུ་རྟ་ཞེས་པ་རུ་ཐུང་ངུ་ནི་རབ་ཏུ་ལ་འཇུག་པ། རུ་རྟ་ཞེས་པ་རུ་རིང་པོ་བྱེད་པ་ཁ་ལོ་ལ་འཇུག་རུ་ཐུང་བ་དང་ཏ་ལ་ར་མགོ་སྦྱར་བ་བོད་ལུགས་ལ་སོང་བས་ཟུར་ཉམས་པའོ།། མ་ནུ་རུ་རྟ། རབ་ཏུ་ཡིད་འོང༌། མ་ནུ་རཱུ་རྟ། ཁ་ལོ་ཡིད་འོང་སྟེ། སྐབས་འདིར་ཁ་ལོ་ཡིད་འོང་སྟེ། འདིའི་ཁ་ལོ་ལས་དྲི་མ་ཡིད་འོང་པའི་ས་ལས་འབྱུང་བས་སོ།། མིང་ནི་ཀུཥྛ། མཛེ་ཅན། ཀུཥྛ། སོ་བ་ལ་ཀུཥྛ། བྷཱ་དྷ། རོ་ག་རུཎྜ་རྣམས་ནད་ཅན་ཏེ། དོན་ཡང་རྩ་བར་ཚི་ཁུ་ཁྲག་དང་ཆུ་སེར་འདྲ་ཡོད་པས་མཛེ་ཅན་དང༌། རྩ་བར་གསར་པ་སྐྱེ་དུས་ནས་ཁོང་རུལ་བ་ལྟ་བུ་ཡོད་པས་ནད་ཅན་ཏེ་ཤ་རུ་ལྟར་ཁོང་སྟོང་པས་སོ།། འདི་ལ་དཀར་ནག་གཉིས་འབྱུང་པས། དཀར་པོ་ཁམས་ཀྱི་རུ་རྟས་ཚད་འཁྲུགས་གཉན་ཚད་སེལ།། ཞེས་དང༌། ནག་པོ་རྒྱ་གར་དང་ལ་སྟོད་ཏི་སེའི་ཕྱོགས་སོགས་ནས་རི་སྐྱེས་ཞིང་འཛུགས་ཅི་རིགས་འབྱུང་བ་དྲི་ཞིམ་པས་སྤོས་ཀྱི་གཙོ་བོར་བྱེད་པས་རླུང་ཤས་ཆེ་བ་ལ་ཕན་པ་ཡིན།། གཉིས་ཀར་འདྲ་ཡིག་ལས། རུ་རྟ་ཤ་རུ་གོག་པོ་འདྲ།། ཞེས་སོ།། ལྕགས་ཕྲེང་ལས་མ་རུལ་སྨྱོ་ཡང་ནུས་གསུངས་པའི་རྒྱུ་མཚན་བཅས་མ་ངེས་སོ།། ལུང་ཕྱི་མར་སེར་བླ་འཁྱིལ་པ་ནི། སེར་བུའི་བླ་ནི་རླུང་ནད་ཡོད་པའི་བླ་རྟགས་སུ་སྤོས་པས་ཁོང་རླུང་འཁྱིལ་བའོ།།